Ձեր վստահելի աղբյուրը

«Միայն կարող եմ հայտնել՝ իրավիճակը վերահսկելի է, ամեն ինչ կառավարվում է»,- ArmLur.am-ին հայտնել է ՊՆ ռազմական վերահսկողական ծառայության պետ գեներալ-գնդապետ Մովսես Հակոբյանը։

Անդրադառնալով ժամկետային զինծառայողների ծնողների անհանգստության վերաբերյալ հարցին, Մ. Հակոբյանն ասել է.

«Զինվորների ծնողներին հորդորում ենք հանգիստ լինել, իրականացվող գործողություններում ոչ մի պարտադիր ժամկետային զինծառայող ներգրավված չէ»:

Հիշեցնենք, որ Հայաստան-Ադրբեջան պետական սահմանի՝ Տավուշի հատվածում երեկվանից ռազմական գործողություններ են իրականացվում։

Երեկ ժամը 12:30-ի սահմաններում, Ադրբեջանի զինված ուժերի զինծառայողները, անհասկանալի պատճառով, ՈՒԱԶ մակնիշի ավտոմեքենայով Տավուշի ուղղությամբ ՀՀ պետական սահմանը խախտելու փորձ են կատարել։

Հայկական կողմի նախազգուշացումից հետո Ադրբեջանի զինծառայողները, թողնելով ՈՒԱԶ մակնիշի ավտոմեքենան, վերադարձել են իրենց դիրք:

Ժամը 13: 45-ին Ադրբեջանի զինված ուժերի զինծառայողները կրկնել են հայկական զինված ուժերի սահմանային դիրքը գրավելու փորձը, կիրառելով հրետանային կրակ, սակայն ճնշվել են հայկական կողմից և կորուստներ կրելով, հետ շպրտվել:

Հայկական կողմից կորուստներ չկան:

Այսօր հայտարարվեց երկու ոստիկանի վիրավորվելու մասին, ադրբեջանական կողմը, ըստ տարածված տեղեկաությունների, 17 սպանված ունի։ Երեկ Ադրբեջանի պաշտպանության նախարարությունը հաստատել էր երեք սպանվածի մասին տեղեկությունները։