Ձեր վստահելի աղբյուրը

Թուրքիայի մշակույթի և զբոսաշրջության նախարարությունը և երկրի կրոնների հարցերով վարչությունը համատեղ մշակում են առաջարկություններ՝ Ստամբուլի Սուրբ Սոֆիայի տաճարում մուսուլմանական աղոթքների նախապատրաստման վերաբերյալ: Գազետա.ռու-ի հաղորդմամբ, այդ մասին գրում է Hurriyet-ը։  

Հաղորդվում է, որ տաճարում կարող է տեղադրվել հատուկ լուսավորության համակարգ, որի միջոցով լազերային ճառագայթները փոխարինեն սրբերի դեմքերը երկրպագության ընթացքում: Այս համակարգը թույլ կտա, որպեսզի աղոթողները  չտեսնեն քրիստոնեական խճանկարներ և որմնանկարներ:

Թերթի հաղորդմամբ, միևնույն ժամանակ ուսումնասիրվում են այլ տարբերակներ: Ենթադրվում է, որ խճանկարը փակվելու է վարագույրով: Այնուամենայնիվ, այս տարբերակը չի համարվում հիմնականը։

Իսլամն արգելում է կենդանի էակների պատկերները: Տվյալ կրոնում սա համարվում է կռապաշտություն:

Ավելի վաղ Թուրքիայի նախագահը հրամանագիր էր ստորագրել Սուրբ Սոֆիայի տաճարի կարգավիճակի փոփոխության վերաբերյալ՝ թանգարանից  վերածվել է մզկիթի։
Սուրբ Սոֆիան հիմնադրվել է բյուզանդական կայսր Հուստինիանոս I-ի հրամանով և բացվել է 537 թվականի դեկտեմբերի 27-ին:

Գրեթե 1000 տարի որպես քրիստոնեական Բյուզանդիայի գլխավոր տաճար ծառայած Սուրբ Սոֆիան մզկիթի է վերածել օսմանյան սուլթան Մեհմեթ Ֆաթիհը՝ 1453-ին Բյուզանդիայի մայրաքաղաք Կոստանդնուպոլիսը գրավելուց հետո։ 

1930-ին 4 տարով փակվելուց հետո Թուրքիայի Հանրապետության հիմնադիր նախագահ Մուստաֆա Քեմալ Աթաթուրքի նախաձեռնությամբ վերածվել է թանգարանի։ Մի քանի տասնամյակից այն ընդգրկվել էր ՅՈՒՆԵՍԿՕ-ի համաշխարհային ժառանգության ցոևցակում։  Սակայն ներկայիս Թուրքիայի իշխող կուսակցությունը և նախագահ Ռեջեփ Թայիփ Էրդողանը վերջին տարիներին պարբերաբար օրակարգ էին բերում տաճարը կրկին մզկիթի վերածելու հարցը։