Ձեր վստահելի աղբյուրը

«Այսօրվա դրությամբ ադրբեջանական զինված ուժերի կողմից թիրախավորվել են հայկական բնակավայրերը, մասնավորապես, Չինարի, Այգեպար, Ներքին Կարմիրաղբյուր, Պառավքար համայնքները»,- Իջևանում` ճգնաժամային տեղեկատվական կենտրոնում կայացած ճեպազրույցում ասաց ՀՀ պաշտպանության նախարարության նախկին մամուլի խոսնակ, Վազգեն Սարգսյանի անվան ռազմական համալսարանի հրամանատարաշտաբային ֆակուլտետի պետ Արծրուն Հովհաննիսյանը:

Նա նշեց, որ, մասնավորապես, այսօր մի քանի անգամ հրետակոծության է ենթարկվել նաև Բերդ քաղաքը, թիրախավորվել են երկու գործարան, վնասվել են տներ, գազատար։

Արծրուն Հովհաննիսյանի խոսքով, բարեբախտաբար, զոհեր չունենք խաղաղ բնակչության շրջանում, նաև վիրավորներ չկան, միայն նյութական վնասներ են կրել։

«Հրետակոծության ընթացքում հայկական զինված ուժերը կատարել են իրենց առջև դրված մարտական խնդիրները, լռեցրել են հակառակորդին հնարավոր բոլոր ձևերով։ Հակառակորդն այս ընթացքում կիրառել է հրետանային միջոցներ, ականատներ, տանկեր»,- ասաց նա։ 

Արծրուն Հովհաննիսյանը նաև ասաց, Ադրբեջանն իր  գյուղերում թիրախավորում է սեփական բնակչությանը, տների մերձակայքում տեղակայում են զրահատեխնիկա, ունեն համապատասխան ապացույցներ։ 

Ըստ նրա՝ հուլիսի 12-ից սկսած հայկական զինուժը հինգից ավելի ադրբեջանական ԱԹՍ է խոցել։

Նա հայտնեց նաև, որ հայ-ադրբեջանական սահմանին՝ սկսած 18։00-ից իրավիճակը համեմատաբար հանգիստ է, կրակոցները քիչ են, մեծ տրամաչափի չեն, լարվածությունը նվազում է։ 

Անդրադառնալով վիրավորներին՝ Արծրուն Հովհաննիսյանը տեղեկացրեց, որ, ըստ բժիշկների, վիրավորների կյանքին վտանգ չի սպառնում, հիմնականում միջին ու թեթև վնասվածքներ են։

Նա նաև ընդգծեց, որ հայկական որևէ բնակավայրից տարհանում տեղի չի ունեցել. «Վստահ եմ, որ տեղի չի ունենա։ Մեր ժողովուրդն ամուր կանգնած է իր դիրքերում»։

Հարցին՝ պահեստազորին, երկրապահներին ներգրավելու անհրաժեշտություն տեսնո՞ւմ եք, Ա. Հովհաննիսյանը պատասխանեց, որ այս պահին դրա անհրաժեշտությունը չկա, ՀՀ Զինված ուժերն իրենց խնդիրները հստակ կատարում են։

Դիրքային փոփոխությունների մասին հարցերին նա նպատակատարմար չգտավ պատասխանել, քանի դեռ կա մարտական իրավիճակ։ 

Միաժամանակ ասաց. «Հայաստանի Զինված ուժերը բոլոր տարիներին, բոլոր հնարավոր շանսերը ստեղծել, օգտագործել են դիրքերը բարելավելու համար։ Սա ճշմարտություն է, որը պետք չի ընդհանրապես քննարկել»։

Ինչ վերաբերում է ադրբեջանական կողմի կորուստներին, նա նշեց, որ հստակ թիվ չի կարող ասել. «Մենք այսօր տեսել ենք 11 զոհի հաստատում, որոնց մեջ մտնում էին առաջին օրերի զոհերը։ Գրեթե վստահ եմ, որ այդ թիվը կարող է փոխվել։ Այդ թվում են նաև երրորդ բանակային կորպուսի շտաբի պետի և հրետանու պետի անունները՝ վերևում, և մինչև ներքև՝ պայմանագրային զինծառայողներ, շարքայիններ»։

Ա.Հովհաննիսյանը նաև նշեց, որ հակառակորդը օգտագործել է «Գրադ»։