Ձեր վստահելի աղբյուրը

«Իմ քայլը» խմբակցության պատգամավոր Մերի Գալստյանը Տնտեսական հարցերի մշտական հանձնաժողովի արտահերթ նիստում հայտնեց, որ ընդերքօգտագործման ոլորտի կառավավարման ռազմավարության առումով մտածելու կարիք կա՝ արդյո՞ք ընդերօգտագործման իրավունքը կարելի է գրավ դնել:

Պատգամավորը «ՀՀ ընդերքի մասին օրենսգրքում փոփոխություններ և լրացումներ կատարելու մասին» օրենքի նախագիծը զեկուցող ՏԿԵ նախարարի տեղակալ Լիլիա Շուշանյանից նաև հետաքրքրվեց, թե կառավարությունը քննարկե՞լ է «Լուսավոր Հայաստան» խմբակցության պատգամավոր Արկադի Խաչատրյանի առաջարկը, ըստ որի՝ պետությունը չպետք է միջամտի ընդերքօգտագործման իրավունքի գրավադրման գործընթացին:

«Մենք կողմ ենք, որ միանշանակ պետք է տրվի այդ հնարավորությունը, որովհետև այն բավականին ծախսատար և ժամանակատար ոլորտ է»,- պատասխանեց փոխնախարարը և հավելեց, որ ընդերքօգտագործման իրավունքի գրավադրումն ընդունված պրակտիկա է ամբողջ աշխարհում:

Լիլիա Շուշանյանի խոսքով, գրավի միջոցները պետք է ծառայեն իրենց նպատակին, այդ պատճառով էլ նախագծում սահմանված կարգավորումներով պետությանը վերահսկման լծակներ են տրված:

«Տնտեսվարողը պետք է բերի և ցույց տա, որ այդ բոլոր միջոցները օգտագործվում են հանքի շահագործման համար»,- հայտնեց փոխնախարարը:

Մերի Գալստյանն էլ նկատեց, որ գրավադրման գումարը կարող է ծախսվել ընկերության տնօրենի, կամ տնօրենների խորհրդի աշխատավարձերի վճարման համար:

Փոխնախարարը չբացառեց, որ այդ միջոցները կարող են ուղղվել նաև այլ վարկերի մարման համար՝ բայց կրկին հանքի շահագործման շրջանակներում:

Վերջինս տեղեկացրեց, որ եթե ընկերությունը չի կատարում բանկի առաջ ստանձնած պարտավորությունը, ապա բանկը շահագործման իրավունքը դնում է աճուրդի, որի մասնակիցները համաձայնեցվում են լիազոր մարմնի հետ: Գնորդ չլինելու դեպքում բանկն է իրականացնելու շահագործումը: