Ձեր վստահելի աղբյուրը

«Երեկ ժամը 18։00 սկսած, ըստ էության, առաջնագծում լարվածության աստիճանական նվազում է տեղի ունեցել, կրակոցները գնալով քչացել են»,- Իջևանում` ճգնաժամային տեղեկատվական կենտրոնում կայացած ճեպազրույցում ասաց ՀՀ պաշտպանության նախարարության նախկին մամուլի խոսնակ, Վազգեն Սարգսյանի անվան ռազմական համալսարանի հրամանատարաշտաբային ֆակուլտետի պետ Արծրուն Հովհաննիսյանը:

Նա նշեց, որ ժամը 00։15-ից սկսած գրեթե լիարժեք դադար է տեղի ունեցել, չեն կիրառվել հատկապես մեծ տրանափաչի զենքեր, հրետանային միջոցներ և այլն։

«Բայց մինչև այդ ժամը որոշակի խախտումներ, ակտիվություն եղել է։ Մեր հակաօդային պաշտպանությունը խոցել է նաև երկու ԱԹՍ, որոնք ընկել են միջդիրքային տարածքում։ Դրանից հետո հանգիստ է, անդորր է։ Այս պահին շարունակվում է այդ վիճակը»,- ասաց նա։

Ա. Հովհաննիսյանի խոսքով, արցախյան հատվածում էլ է հանգիստ եղել, որևէ արտառոց բան տեղի չի ունեցել։

Նա նաև հայտնեց, որ արդեն շրջանառվում է ադրբեջանական կողմի 12 զոհերի անուններy։

Հարցին՝ ադրբեջանական կողմի հետ զինադադարի հետ կապված պայմանավորվածություն կա՞, Ա. Հովհաննիսյանը պատասխանեց. «Ես, ճիշտն ասած, պայմանավորվածության մասով հստակ տեղեկություն չունեմ, բայց հաճախ է լինում, որ գիշերներն ակտիվությունն ընկնում է։ Եթե մենք նման ինֆորմացիա ունենանք, անպայման կհայտարարենք»։

ՀՀ զինված ուժերն իրենց խնդիրը փայլուն են կատարել ու կատարում են

Արծրուն Հովհաննիսկանը նշեց, որ ՀՀ զինված ուժերն իրենց խնդիրը փայլուն են կատարել ու կատարում են, կոնֆլիկտի բնույթը, ծավալներն այնպիսին չեն, որ ՀՀ-ն դիմի այլ քայլերի, այդ թվում նաև պահեստազորայինների կամ կամավորականների աջակցությանը։

«Մենք վստահ ենք, որ մեր կամավորականները պատրաստ են, շնորհակալ ենք իրենց ամեն ինչով, բայց այս պահին իրենց զավակները, ոմանց թոռներն իրենց խնդիրը փայլուն կատարում են»,- ասաց Ա. Հովհաննիսյանը։

ՊՆ ներկայացուցչի խոսքով, ադրբեջանական զինված ուժերն իրենց սպառազինությունում եղած, կարելի է ասել, ողջ զինանոցը գրեթե կիրառել է բացառությամբ մի քանի միջոցների․ դրանք են, մասնավորապես, բոլոր տրամաչափերի հրազենային զենքեր, տանկեր, հրետանային միջոցներ, հարվածային ԱԹՍ-ներ։

«Մեր ՀՕՊ միջոցները խոցել են մոտավոր 10 միավոր ԱԹՍ, դրանից մեջ մտնում են ինչպես փոքր, հետախուզական, մարտավարական խնդիր կատարող, այնպես էլ հարվածային, թանկարժեք «Elbit Hermes 900» անօդաչու թռչող սարքը»,- նշեց նա։

Նա կրկնեց, որ հայկական որևէ բնակավայրից որևէ տարհանում չի եղել, կարծում է՝ չի էլ լինի։

Գազատարն էլ երկու անգամ վնասվել է և վերականգնվել է։

Ա. Հովհաննիսյանը կրկնեց, Հայաստան ԶՈՒ լիովին ի վիճակի են կատարել իրենց խնդիրները, կոնֆլիկտն այն աստիճանի չէ, որ ՀՀ-ն անհրաժեշտություն գտնի դիմել ՀԱՊԿ-ին որևէ միջամտության համար. «Հայաստանի Զինված ուժերն իրենց խնդիրը հստակ կատարում են»։

12:03

Խոցված ադրբեջանական «Elbit Hermes 900» անօդաչու թռչող սարքի մասին

«Մեր խոցած Elbit Hermes 900-ը թանկարժեք, բարձր տեխնոլոգիական թռչող ուղեղային կենտրոն է։ Խոցվել է հայկական ՀՕՊ ստորաբաժանումների միջոցների կողմից։ «Оса» զենիթահրթիռային համակարգն է, որը տեղում է արդիականացվում։

Մեր ռազմարդյունաբերական համալիրն, ըստ էության, մի քանի տարի առաջ արդեն յուրացրել է «Оса»-ի արդիականացման տեխնոլոգիան։ Ապրիլյան պատերազմի ժամանակ, դրանից առաջ, դրանից հետո, ադրբեջանական անօդաչուների խոցման ամենալավ գործիքը, կարելի է ասել, «Оса» համալիրներն են»,- ճեպազրույցում ասաց Արծրուն Հովհաննիսյանը։ 

Նրա խոսքով, եթե հայ ինժեներների կողմից հետախուզական ԱԹՍ-ների էջը կարելի է համարել գերագույն կատարված ու փակված, մինչև վերջ յուրացրել են, տիրապետում են ու կատարելագործելու են։

«Մարտական ԱԹՍ-ների էջը ևս յուրացնում ենք, տեսնում եք իրենց արդեն գործունեության մեջ, վաղը, մյուս օրը է՛լ ավելի կկատարելագործենք, կզարգացնենք, առաջ կգնանք»,- նշեց նա։