Ձեր վստահելի աղբյուրը

Մենք ունեցել ենք բնակարանների, տների, ենթակառուցվածքների  ավերածություններ: Այս մասին  լրագրողների հետ զրույցում ասաց  Տավուշի մարզպետ Հայկ Չոբանյանը:

«Տասնյակ ռմբակոծություններ են եղել, սակայն մարդկային վնասներ չեն եղել, չենք ունեցել քաղաքացիական բնակչության շրջանում զոհեր և վիրավորներ: Դա պայմանավորված է եղել սահմանին պրոֆեսիոնալ գործելաոճով: Որևէ խուճապ չի եղել, մարդիկ, այսօր էլ շարունակում են զբաղվել գյուղատնտեսությամբ: Հույս ունեմ, որ այս պահին ստեղծված խաղաղությունը հաստատակամ կլինի և մարդիկ կշարունակեն ապրել բնականոն կյանքով»,-ասաց Չոբանյանը:

Անդրադառնալով ավերավածություններին, մարզպետը տեղեկացրեց,որ այս պահին գնահատման ուղղությամբ աշխատանքներ են տարվում:

«Այս պահին իրականացվում են ավերավածությունների գնահատման աշխատանքներ բոլոր գյուղերում:  Դրանք հիմնականում սահմանապահ գյուղերն են, այս դեպքում՝ Չինարի, Այգեպար, Ներքին Կարմիր Աղբյուր և Մովսես գյուղերը: Երկար տարիների դադարից հետո հրետակոծվել է նաև Բերդ քաղաքը, ինչն աննախադեպ է իրականում, եղել են վնասներ արդյունաբերական ձեռնարկությունների մասով, բարեբախտաբար մարդկային զոհեր չունենք»,-նշեց մարզպետը:

Չոբանյանի հավաստմամբ ՝ վնասի գնահատումից հետո ամեն ինչ արվելու է , որպեսզի շուտափույթ վերականգնվեմն բոլոր վնասները ու մարդկանց փոխհատուցում տրվի: