Ձեր վստահելի աղբյուրը

«Այսօր բավականին ծանր օր ենք ունեցել, վաղ առավոտից ռմբակոծվել են Տավուշի մարզի Բերդ համայնքի բնակավայրերը»,- Իջևանում` ճգնաժամային տեղեկատվական կենտրոնում տեղի ունեցած ճեպազրույցում ասաց Տավուշի մարզպետ Հայկ Չոբանյանը։

Նա նշեց, որ համայնքի քաղպաշտպանության համակարգը բավականին լավ է աշխատել, դրա շնորհիվ է, որ մինչև օրվա երկրորդ կես մարդիկ կարողանում էին պատսպարվել։

«Ցավոք, օրվա երկրորդ կեսին ունեցանք վիրավոր Չինարի գյուղում։ Բնակչի վիրավորումից հետո  ԱԻՆ տրանսպորտային միջոցը մոտեցել է համապատասխան աջակցություն ցուցաբերելու, թիրախավորվել է նաև ԱԻՆ ավտոմեքենան։ Ռմբակոծումն իրականացվել են անօդաչու թռչող սարքերից։ Այսօրվա առանձնահատկությունն այն է, որ քաղպաշտպանությունը և պատսպարումը յուրահատուկ էր և առաձնահատուկ երևի մեր վերջին 30 տարվա պատմության ընթացքում. պատսպարման գործողությունները և քաղպաշտպանությունը հիմնված էր անօդաչու թռչող սարքերից պատսպարվելու պահանջի վրա։ Նորություն էր մեզ համար»,- ասաց մարզպետը։

Նա նշեց, որ, ըստ էության, թիրախավորված էր ողջ տարածաշրջանը։ Հ. Չոբանյանի խոսքով,  կարողացել են ապահովել գրեթե տոտալ պատսպարում նկուղներում, ապաստարաններում, փակ տարածքներում ոչ միայն մարդկանց, նաև տրանսպոտային միջոցները։

Նա նշեց, որ վիրավոր  քաղաքացու առողջական վիճակը  կայուն է, տեղափոխվել է Երևան, այս պահին կյանքին ու առողջությանը վտանգ չի սպառնում։ 

Ներկայացված տվյալներով, այս օրերի ընթացքում եղել է վնասման 51 դեպք, որոնցից 4-ը ենթակառուցվածքների, 4-ը տրանսպորտային միջոցների, 2-ը ընտանի կենդանիների և 41-ը շինությունների։ 41 շինություններից 29-ը վնասվել են մինչ այսօր, 22-ը՝ այսօրվա ընթացքում։ 2 շինություն ենթակա է լիարժեք վերականգնման, մնացած շինությունները հնարավոր է վերականգնել հիմնանորոգման միջոցով՝ առանց նոր շինարարության։