Ձեր վստահելի աղբյուրը

«Անցնող գիշերը սահմանին եղել է համեմատաբար հանգիստ։ Մոտավորապես 70 անգամ է խախտվել հրաադադարի ռեժիմը, հիմնականում կիրառվել են ոչ մեծ տրամաչափի հրաձգային զենքեր»,- լրագրողների հետ հանդիպմանն ասաց ՀՀ պաշտպանության նախարարության ներկայացուցիչ Արծրուն Հովհաննիսյանը։

Նա նշեց, որ Հայաստանի Զինված ուժերը լիովին վերահսկում է իրավիճակը։ Ա. Հովհաննիսյանի խոսքով, վիրավոր զինծառայողների վիճակում դրական դինամիկ կա, սակայն ծայրահեղ ծանր վիճակում գտնվող զինծառայողի մոտ վիճակի փոփոխություն չկա։

Ասուլիսին ներկա կրթության, գիտության, մշակույթի և սպորտի նախարար Արայիկ Հարությունյանն էլ ասաց, որ այսօր Տավուշի մարզպետ Հայկ Չոբանյանի հետ այցելել են մի շարք համայնքներ, ուսումնասիրել ուսումնական հաստատությունները։

«Մեզ հետաքրքրում էր սեպտեմբերի 1-ից առաջ ինչպես են նախապատրաստվում ուսումնական հաստատությունները։ Հիմա քննարկում ենք սեպտեմբերի 1-ին դասերը վերսկսելու հնարավորությունը առկա ուսուցման մեթոդով, բայց նաև սրան գումարվել է լարված ռազմական իրավիճակը մի շարք համայնքների շուրջ։ Մեզ հետաքրքրում էր, թե ապաստարանների, անվտանգության տեսակետից դպրոցներն ինչպես են պատրաստված։ Դիտարկել ենք դպրոցները Այգեպարում, Ներքին Կարմիրաղբյուրում և Մովսեսում։

Դպրոցները տարբեր աստիճանի պատրաստվածություն ունեն, ըստ էության, ապաստարաններ կան։ Բայց պարոն մարզպետի հետ մի շարք հանձնարարականներ ենք տվել դպրոցների ղեկավարներին և խոսել ենք նաև համայնքապետերի հետ, որպեսզի աջակցություն ստանանք այս առումով, և մինչ սեպտեմբերի 1-ը ոչ միայն երեք համայքներում, որոնք այցելել ենք, այլև սահմանապահ մյուս համայնքներում պատշաճ պատրաստություն լինի ապաստարանների տեսակետից, և մենք սեպտեմբերի 1-ին, երբ հնարավորություն ստանանք վերսկսելու առկա մեթոդով դասընթացները, ապաստարանների տեսակետից նույնպես ապահովված լինենք և ռազմական իրավիճակների սրման կամ հրետակոծության ժամանակ կարողանանք մեր երեխաներին տեղափոխել այդ ապաստարանները»,- ասաց Ա. Հարությունյանը։

Նա նշեց, որ ապաստարանները կբերվեն պատշաճ աշխատանքային վիճակի, թեպետ մի մասը պատրաստ են, պարզապես շտկումներ են պետք։

Մարզպետ Հայկ Չոբանյանն ասաց, որ նախատեսում են նոր ապաստարանների տարածքների ստեղծում դպրոցներում ու դպրոցներին կից։ Նա նշեց, որ գյուղերում լիարժեք վերադարձել են գյուղատնտեսական աշխատանքներին։

Մարզպետն ընդգծեց, որ այսօր Մովսեսի եկեղեցում մասնակցել են նաև պսակադրության արարողության։

«Կյանքը վերադարձել է, մարդիկ ապրում են իրենց բնականոն կյանքով»,- նշեց Հ.Չոբանյանը։

Հարցին՝ ադրբեջանական լրատվամիջոցներում փորձագետները շահարկում են միջազգային էներգակիրներին, որ Հայաստանը կհարվածի ադրբեջանական ենթակառուցվածքները, ի՞նչ նպատակով է դա արվում, Արծրուն Հովհաննիսյանը պատասխանեց.

«Նախօրեին վարչապետ Նիկոլ Փաշինյանը հստակ նշեց, որ Ադրբեջանի կրած պարտությունից հետո դա նոր քարոզչական թեզ է արտաքին լսարանին ուղղված։ Հայաստանի Զինված ուժերը մշտապես ունեցել են տեխնիկապես նման հնարավորություն, սակայն երբեք չեն ունեցել և չունեն նման ցանկություն, հայեցի չէ ոչ մի տեսակետից։ Ադրբեջանի կողմից շրջանառվող կեղծ թեզ է։

Մենք ասում ենք՝ այս տարածաշրջանով անցող նավթագազային մուղերը, որոնք ունի Ադրբեջանը, միջազգային ընկերություններին են պատկանում, թող միջազգային ընկերությունները վստահ լինեն, որ Հայաստանն անվտանգության երաշխավոր է, ոչ թե սպառող։ Հայաստանն էլ ավելի լավ կարող է ապահովել դրանց անվտանգությունը, քան որևէ մեկն այս տարածաշրջանում»։

Մանրամասները՝ տեսանյութում։