Ձեր վստահելի աղբյուրը

Սնանկության դատարանի դատավոր Գևորգ Նարինյանը չի ընդունում իրեն առաջադրված
մեղադրանքը։ Panorama.am-ի հետ զրույցում հայտնեց նրա փաստաբան  Մհեր Հակոբյանը։

«Որևէ հոդվածով իրեն մեղավոր չի համարում»,-ասաց նա։

Հիշեցնենք, որ Երևանի ընդհանուր իրավասության դատարանի դատավոր Մնացական Մարտիրոսյանի որոշմամբ Նարինյանն այսօր կալանավորվել է։ Նա այժմ գտնվում է «Վարդաշեն» քրեակատորաղական հիմնարկում։

«Այս պահին ուսումնասիրում ենք կալանքի վերաբերյալ դատարանի որոշումը, դրանից հետո իմ վստահորդի հետ կքննարկենք ու ըստ դրա կորոշենք՝ բողոքարկե՞լ այն, թե՞ ոչ»,-ասաց դատավորի պաշտպանը։

Սնանկության գործով դատարանի դատավորին մեղադրանք  առաջադրվել Քրեական օրենսգրքի մի քանի հոդվածների հատկանիշներով՝

38-308-րդ հոդվածի 2-րդ մաս՝  հանցկացությունը՝ պաշտոնատար անձի կողմից իր պաշտոնեական դիրքը ծառայության շահերին հակառակ օգտագործելը կամ ծառայողական պարտականությունները չկատարելը՝ շահադիտական, անձնական այլ շահագրգռվածությունից կամ խմբային շահերից ելնելով

190-րդ հոդված՝ հանցավոր ճանապարհով ստացված եկամուտներն օրինականացնելը (փողերի լվացումը)

310.1-րդ հոդված՝ ձեռնարկատիրական գործունեությանն ապօրինի մասնակցելը

314.3-րդ հոդված՝ պաշտոնեական կեղծիքը։

Հիշեցնենք, որ հուլիսի 17-ին Բարձրագույն դատական խորհուրդը, քննության առնելով ՀՀ գլխավոր դատախազի կողմից ներկայացված միջնորդությունները ՀՀ սնանկության դատարանի դատավորներ Գևորգ Նարինյանի և Արա Կուբանյանի նկատմամբ քրեական հետապնդում հարուցելու համաձայնության հարցի վերաբերյալ, որոշել է միջնորդությունները բավարարել և տալ համաձայնություն՝ ՀՀ սնանկության դատարանի վերոնշյալ դատավորների նկատմամբ քրեական հետապնդում հարուցելու վերաբերյալ: