Ձեր վստահելի աղբյուրը

Պաշտպանության նախկին նախարար, սահմանադրական կարգի տապալման գործով ամբաստանյալ Սեյրան Օհանյանի փաստաբան Կարեն Մեժլումյանն այսօրվա դատական նիստում միջնորդություն ներկայացրեց՝ դատարան հրավիրել ԱԺ նախկին նախագահին։

Նա ընդգծեց՝ «Նորմատիվ իրավական ակտերի մասին» օրենքի 41-րդ հոդվածը հստակ նշում է, որ նորմատիվ իրավական ակտը հատուկ մեկնաբանվում է՝ հաշվի առնելով այն ընդունող մարմնի նպատակը։

«Մենք ասում ենq, որ Քրեական օրենսգրքի 300.1 հոդվածի հետ կապված լուրջ խնդիր կա։ Այն և Սահմանադրական դատարանն է վարույթ ընդունել, Վենետիկի հանձնաժողովը, այսինքն` իրավական որոշակիության խնդիր կա։ Նպատակը պարզելու համար ասում ենք, որ ԱԺ նախագահին հրավիրեք՝ նպատակը, անհրաժեշտությունը նշի, երբ ձևավորեց աշխատանքային խումբը, նպատակը ո՞րն էր։ Մենք չենք ասում, գան ու մեկնաբանեն իրենց ընդունած օրենքը, այլ ասեն, թե ինչ նպատակով օրենքն ընդունվեց»,- ասաց Մեժլումյանը։

Նա առաջարկեց դատարան հրավիրել նաև աշխատանքային խմբի անդամներին։

«Թող գան ասեն, որ իրենց ներկայացրած նախագծի նպատակը ոչ թե որոշակիության պահանջներին համապատասխանեցնելը չէր, այլ նպատակ կար»,- ասաց Մեժլումյանը։

Նա նշեց, որ իր միջնորդության քննությունը չի կարող հետաձգվել, այն քննության պետք է առնվի հիմա, այդ մարդիկ պետք է հարցաքննվեն հենց այս պահին։

«Քանի որ եթե նրանք ասեն, իրավական որոշակիության համապատասխանության համար է այն ընդունվել, ես պնդելու եմ իմ նախկինում արած միջնբորդությունը, որ վարույթը կասեցվի ու դիմեք ՍԴ»,- ասաց նա։

Դատախազներն ու տուժող կողմի ներկայացուցիչները դեմ արտահայտվեցին, նշելով, որ տվյալ միջնորդությունը պաշտպանները կարող են ներկայացնել հետագայում, քանի որ այժմ գործը չի գտնվում ապացույցների հետազոտման փուլում։

Պաշտպան Հովհաննես Խուդոյանը նշեց, որ միջնորդություններում հիշատակված անձինք տարիքով են և հնարավոր է, որ մի քանի տարի անց նրանք այլևս չեն կարող ներկայանալ դատարան։

Խուդոյանը հայտարարեց, որ դատարանն իր այս գործողություններով նպաստում է, որպեսզի այս գործով ամբողջական քննություն չկատարվի։

Իր հերթին պաշտպան Կարեն Մեժլումյանը կարծիք հայտնեց, որ սույն գործով վարույթը պետք է կասեցվի, մինչև դատավորների վեթինգի ավարտը, որովհետև մտավախություն կա, որ որևէ դատավոր, ով կարող է այս միջնորդությունները լուծել կամ օբյեկտիվ ու բազմակողմանի քննություն իրականացնել, կընկնի վեթինգի բացասական հետևանքների տակ։

Հիշեցնենք, որ խոսքը 2009-ին ԱԺ  պետական-իրավական հարցերի մշտական հանձնաժողովի նախագահ Դավիթ Հարությունյանի նախագահությամբ   Քրեական օրենսգրքի 225 և 300 հոդվածներում փոփոխություններ և լրացումներ կատարելու մասին համապատասխան օրենքի նախագծի մշակման նպատակով ստեղծված աշխատանքային խմբի մասին է։ Այն ստեղծվել էր ԱԺ նախկին նախագահ Հովիկ Աբրահամյանի հրամանով, աշխատանքային խմբի անդամների թվում են եղել Արծվիկ Մինասյանը, Հրայր Թովմասյանը։