Ձեր վստահելի աղբյուրը

Ազգային ժողովի «Լուսավոր Հայաստան» խմբակցության անդամ Աննա Կոստանյանը հանդիպեց ընդունելության քննությունների արդյունքում բարձր միավորներ ստացած, բայց  բուհեր չընդունված դիմորդներին ու նրանց ծնողներին:

Ծնողները ներկայացրեցին իրենց խնդիրն ու առաջարկությունը.«Մեր բոլորի առաջարկությունն է՝ կրթության, գիտության, մշակույթի և սպորտի նախարարությունը հարց բարձրացնի կառավարությունում, որպեսզի ավելացվեն տեղերը,  ընդունելության քննության հանձնած դիմորդները բոլորը դառնան ընդունված: Դրանից կշահի պետությունը, քանի որ բարձր միավոր ստացած դիմորդներն ապագայում կդառնան  պետության համար լավ մասնագետներ, նաև  բուհը կշահի, քանի որ վճարովի են ընդունվելու: Առաջին կիսամյակի ավարտին թող կազմակերպեն քննություն, վատ առաջադիմություն ունեցողները  թող դուրս մնան»:

Աննա Կոստանյանն ասաց, որ պետք է խոսել ոլորտի պատասխանատուների հետ:

«Նախարարության հիմնական պնդումն այս մասով  այն է, որ բոլոր այն դիմորդները, ովքեր առաջին հայտով նշել են, հստակ, գիտակցաբար, կողմնորոշված են նշել, ցածր միավորի պարագայում իրենք պետք է համարվեն անցած: Լիարժեք ընդունում եմ տեսակետը, որ գիտելիքը չպետք է  նսեմացնել, բարձր միավոր հավաքած դիմորդներն ակնհայտորեն ավելի շատ գիտելիքի են տիրապետում: Աբսուրդային իրավիճակն այստեղ է»,- նշեց պատգամավորը:

Նա ասաց, որ կփորձեն կազմակերպել քննարկում ոլորտի պատասխանատուների հետ իրավիճակը հասկանալու համար: Ա. Կոստանյանի խոսքով, երեկ նախարարության աշխատակիցներից մեկի հետ է զրուցել, համենայնդեպս այդ պահին ասացին՝ պնդմամբ, որ հետ գործընթաց չի լինելու, բայց քանի որ քիչ չեն բարձր միավոր ստացած դիմորդները, կարծում է, ամեն դեպքում քննարկման թեմա պետք է դառնա: