Ձեր վստահելի աղբյուրը

Սահմանադրական կարգի ենթադրյալ տապալման գործով տուժող Սերգեյ Եղիազարյանի ներկայացուցիչ Էդուարդ Ասլանյանն այսօրվա նիստում բացարկի միջնորդություն ներկայացրեց մեղադրող դատախազներին՝ Պետրոս Պետրոսյանին ու Գևորգ Բաղդասարյանին։

«Գտնում ենք, որ սույն գործով մեղադրանքը պաշտպանող դատախազները չեն կարող մասնակցել գործի քննությանը և պետք է հեռացվեն վարույթից»,-ելույթն այսպես սկսեց Ասլանյանը՝ ավեռլացնելով, որ տուժողի նկատմամաբ քրեադատավարական խախտումներ են եղել։

Է. Ասլանյանը ներկայացրեց բացարկի հիմնավորումները, ըստ որոնց, իր պաշտպանյալը՝ Սերգեյ Եղիազարյանն ընդգրկվել է դատակոչի ցուցակում միայն 2018թ օգոստոսին կազմված տուժողի լրացուցիչ հարցաքննության արձանագրության հիման վրա։

Նա ընդգծեց, որ քննվող գործի նյութերում ու մեղադրական եզրակացության մեջ ներառված չեն 2008թ մարտի 1-2 Երևան քաղաքում տեղի ունեցած իրադարձությունների պատճառով որպես  տուժող Եղիազարյանի հարցաքննությունների,  բացատրությունների, ցուցմունքների արձանագրությունները, ուժող ճանաչվելու մասին որոշումը, դատաբժշկական փորձաքննության եզրակացությունը և հարուցված վարույթի շրջնակում այլ դատավարական գործողությունների մասին ապացույցները։

Ասլանյանն ասաց, որ Ս. Եղիազարյանը մեղադրական եզրակացությունում ներառված նյութերին ծանոթանալու հնարավորություն չի ունեցել, քանի որ նրան նյութերը չեն տրամադրվել։
«Նախաքննության օրինականությանը հետևելու պարտականությունն իրականացրել է ու մեղադրական եզրակացությունը հաստատել է դատախազ Պետրոսյանը»,-ասաց նա։

Փաստաբանի խոսքով, ներկայացված խախտումների պատճառով տուժող Ս. Եղիազարյանը զրկվել է 2008 թ. մարտի 1-2 Երևան քաղաքում տեղի ունեցած իրադարձությունների ժամանակ որպես տուժած անձ աջակցություն ստանալու հնարավորությունից, քանի որ աջակցության ստանալու համար ներկայացվելիք թղթերի ցանկում պետք է լինի առողջությանը հասցված ծանր կամ միջին ծանրության վնասվածքի բնույթը հաստատող դատաբժշկի փորձաքննության եզրակացությունը, ինչպեսդ նաև տուժող ճանաչելու որոշումը։

«Սակայն դրան չկան գործի նյութերում, ընդգրկված չեն մեղադրական եզրակացության մեջ և չեն տրամադրվում»,-ասաց նա։

Ասլանյանի խոսքով, խախտումների մասին տեղյակ է եղել դատախազը, սակայն քայլեր չի ձեռնարկել օրինականության վերականգնման համար, անտեսել է տուժողի իրավունքների պաշտպանությունը, թույլ է տվել կանխակալ քննություն, ինչն էլ բացասական ազդեցություն է թողնում տուժողի օրինական շահերի պաշտպանության համար։

Նա խնդրեց բավարարել միջնորդությունը։

Գործով մեկ այլ տուժողի ներկայացուցիչ Սեդա Սաֆարյանն ասաց՝ Ասլանյանից նման բան սպասելի էր, քանի որ պաշտպանում է ամբաստանյալների շահերը։

Դատավորի նկատողությունից հետո, ԱՍադարյանը վերադարձավ իրավական դաշտ, ասաց՝ չնշվեց այնպիսի հիմք, որը թույլ կտա ասել, որ դատախազներն ունեցել են կանխակալ վերաբերմունք։
Սարգիս Քլոյանն էլ առարկեց միջնորդությանը, ասաց՝ «Ո՞ւր էիք 12 տարի»։

Պաշտպանական կողմից խոսեց Հայկ Ալումյանը։

«Կարելի է եզրակացնել, որ կառավարության որոշումից օգտվելու համար, ըստ որի մարտի 1-2-ի իրադարձություններից տուժած անձանց դրամական աջակցություն է տրամադրվում,  կան նախապայմաններ։ Այնտեղ նշվում է նաև տուժող ճանաչելու մասին որոշումը, բժշկական փորձաքննության եզրակացությունը։ Փաստորեն կա երրորդ չափանիշը, որը չկա որոշման մեջ։ Այն է՝ ի՞նչ դիրքորոշում ունի տուժող կողմն այս իրադարձությունների վերաբերյալ։ Այսինքն, եթե նրա դիրքորոշումն այն է այս քրեական գործով, որ եթե մարտի 1-2-ի մեղավորներն այդ դահլիճում չեն, իրական մեղավորները այսօր սկսած երկրի ղեկավարությունից մինչև ուրիշ տեղեր դիրքավորված անձինքն են...»,-Ալումյանի խոսքն ընհատեց դատավորն ու սպառնաց՝ սահմանփակել ելույթը։
Փաստաբանն էլ հակադարձեց, քաղաքական հայտարարություն չի անում, եթե մարդը նման դիրքորոշում ունի, զրկվում է կառավարության որոշմամբ սահմանված աջակցությունից։
«Այն, ինչ ներկայացրեց Ասլանյանը, փաստում է, որ այդ մոտեցումը իրականացվում է դատախազների միջոցով»,-ասաց Ալումյանը։

Յուրի Խաչատուրովի փաստաբան Միհրան Պողոսյանն էլ նկատեց, երբ գործը վարույթ է ընդունվել, իրեն թվում էր, որ միայն պաշտպանական կողմն է դժգոհ եղել ոչ ամբողջական ու ոչ օբյեկտիվ քննությունից, նախաքննության նյութերը չտրամադրելուց։

«Փաստերն եկան ապացուցելու, որ ոչ, այն մարդիկ, ովքեր ցանկանում են օբյեկտիվ իրականությանը վեր հանել, չեն կարող վստահել այս որակի նախաքննությանն ու դրա նկատմամաբ վերահսկողություն սահմանող դատախազին»,-ասաց նա՝ ուշադրություն հրավիրելով, Սաֆարյանի հայտարարությանը, թե այդ տուժողից նման բան սպասելի էր։
Պողոսյանը նկատեց, խմբավորումների բաժանման անթույլատրելի գործողությունը գալիս է հենց սկզբից, ինչն անթույլատրելի է։
«Ոչ մեկ չի մտածում, որ տուժողի գործողությունները միտված են իր իրավունքների պաշտպանությունն է։ Դրա մեղավորը, հարգելի դատարան, հանդիսանում են դատախազները, քանի որ խնդիրները չեն վերավրել նախաքննության փուլում ու գործն ուղարկել են դատարան»,-ասաց նա՝ միանալով միջնորդությանը։
Դատախազ Պետրոսյանն ասաց, միջնորդությունը հակասություններ է պարունակում է, օրինակ, ասում են, գործի նյութերը չեն ստացել, բայց ասում են՝ սա, սա, սա գործի նյութերում չկան։
Դատախազն ասաց, տուժողի կարգավիճակ ունեցող, միջին ու ծանր վնասվածք ստացածները ստացել են աջակցությունը, ասաց՝ հատուցում տրամադրողը իրենք չեն։

«Որևէ խտրական, կանխակալ վերաբերմունքի մասին խոսք լինել չի կարող»,-ասաց Պետրոս Պետրոսյանը։

Դատախազ Գևորգ Բաղադասարյանն էլ նշեց, որ միջնորդությունն առիթ էր տարբեր հայտարարություններ անելու համար, իրենք որևէ կապ չունեն աջակցության տրամադրման հետ։
«Ներկայացված միջնորդությունը իրականության հետ կապ չունի, մեղմ ասած հիմնավոր չէ։ Միջնորդության հեղինակը փորձում էր խաբել։ Առիթ էր պաշտպանության կողմից խոսել այնպիսի հանգամանքների մասին, որոնց մասին արդեն խոսվել է։ Մենք կրկին հանգեցինք այն եզրակացության, որ պետք է սահմանափակել պաշտպանական կողմի իրավունքները»,-ասաց դատախազ Բաղդասարյանը։

Փաստաբան Հայկ Ալումյանը հիշեցրեց, պայմանավորվել են չօգտագործել «խաբում է», «ստում է», եթե բան է փոխվել, իրենք պետք է իմանան, քանի որ իրերն իրենց անուններով կոչելու անհրաժեշտություն է լինում, ստիպված են սահմանփակել իրենց բառապաշարը։

«Դատախազությունը եթե փաստարկ չի ունենում, սկսում է պիտակավորել։ Հիմա տուժողին են պիտակավորում»,-ասաց Ալումյանը։

Դատարանը հեռացավ խորհրդակցական սենյակ։ Որոշումը կհրապարակվի այսօր։