Ձեր վստահելի աղբյուրը

2020 թ. հուլիսի 21-ին Սևանա լճի մակարդակը կազմել է 1978 մետր, որը նախորդ տարվա նույն օրվա համեմատությամբ ցածր է 3 սանտիմետրով: Ասուլիսում տվյալները ներկայացրեց Շրջակա միջավայրի նախարարության «Հիդրոօդերևութաբանության և մոնիտորինգի կենտրոնի» փոխտնօրեն Գայանե Շահնազարյանը:

Նա նշեց, որ Սևանա լճի մակարդակը պետք է լինի 1903,5 մետր. «Այս նիշից դեռ ցածր ենք, բնականաբար, կառավարման և այդ թվին հասնելու տեսանկյունից գոհացուցիչ չէ այս թիվը: Լճի մակարդակի բարձրացումն ինտենսիվորեն պետք է շարունակվի՝ ապահովելու նվազագույն, բայց դեռևս ոչ բավարար այդ 6 մետրը: Գիտական միջավայրում քննարկվում է, որ այս կլիմայական փոփոխությունների պայմաններոմ այդ 6 մետրն էլ դեռևս բավարար կարող է չլինել լճի հավասարակշռության վերականգնման համար»: 

Ներկայացված տվյալներով, երեկվա դրությամբ լճից բաց թողնված ջրի քանակը մոտ 18,9 մետր խորանարդով ավելի է, քան նախորդ տարի: Արփա-Սևան թունելով Սևանա լիճ մուտք գործած ջրի քանակությունը 15,6 մետր խորանարդով ավելի է, քան նախորդ տարի:

Գայանե Շահնազարյանն ասաց, որ այս տարի մարտին դիտվել է բավականին տաք ժամանակաշրջան, լճից գոլորշացումը նորմայից բարձր է եղել 20-70 տոկոսով, ինչն էլ նպաստել է, որ գոլորշացման պրոցեսներն ավելի ինտենսիվ լինեն, քան նախորդ տարի:

Նրա խոսքով, մարտին դիտված տաքացման հետևանքով կենսաբանական որոշ պրոցեսներն ավելի ինտենսիվ էին ընթանում, մայիսի վերջին կրկին դանդաղել են, իսկ հունիսի սկզբին կրկին ակտիվացել։