Ձեր վստահելի աղբյուրը

Այս տարվա ոռոգման շրջանին ընդառաջ 15 ջրօգտագործողների ըներություններն ու «Ջրառ» ՓԲԸ-ն միասին մոտավորապես 6400 կմ ոռոգման համակարգերի վերանորոգման, մաքրման աշխատանքներ են իրականացրել: Ասուլիսում ասաց Ջրային կոմիտեի նախագահ Կարեն Սարգսյանը: Նրա ներկայացմամբ, մոտավորապես 1000 պոմպակայանների, խորքային հորերի, փականների ձեռք բերման տեղադրման, նորոգման աշխատանքներ են իրականացվել, ինչի արդյոնքում ներկայումս կարողանում են անխափան ոռոգում կազմակերպել:

Նա ասաց, որ հիմնական խնդիրները տեխնիկական են, կապված են համակարգերի հետ,  որոնք նախորդ դարի կեսերի են:  Ջրային կոմիտեի նախագահի խոսքով, մեծ ներդրումներ են պետք շատ լավ ոռոգում կազմակերպելու համար, սակայն ճիշտ կառավարման արդյունքոմ կարողանում են ապահովել ոռոգումը:

«Այս տարի չկան բողոքներ, կարողանում ենք պատշաճ  ոռոգում կազմակերպել: Ունենում ենք  խնդիրներ կապված մաշված  խորքային հորերի, պոմպակայանների հետ, որոնք ոռոգման սեզոնի ընթացքում վթարվում են, ջրօգտագործողները վերականգնման ժամանակ դժգոհություն են բարձրացնում, բայց լուծելի խնդիրներ են, ընթացքում լուծվում են»,- նշեց Կ.Սարգսյանը:
 
Նա ասաց, որ Ջրային կոմիտեի կողմից հսկվում են ՋՕ կազմակերպչական աշխատանքները: Կ.Սարգսյանի խնդրեց ջրօգտագործողներին փոխել իրենց վերաբերմունքը ջրօգտագործողների  ընկերության նկատմամբ, վստահեն ընկերություններին, տան իրական տվյալներ, որպեսզի ընկերությունները կարողանան  ջուրը ճիշտ պլանավորել ու  մատակարարել  ջրօգտագործողներին:  Կ.Սարգսյանն ասաց, որ ջրօգտագործող ընկերություններն ոռոգման փուլ մտնելուց նոր իմանում են, թե ջրօգտագործողներն ինչքան հող են մշակում, ինչ մշակաբույսեր, այդ պատճառով էլ ընկերությունները պլանավորման խնդիր են ունենում:

Ներկայացված տվյալների համաձայն, նախորդ տարվա առաջին կիսամյակում տրվել է 187,5 միլիոն խորանարդ մետր ջուր, այս տարի 5 միլիոն խորանարդ մետրով ավելի են տվել: Ներկայիս դրությամբ  արդեն մատակարարել են  271 միլիոն խորանարդ մետր, նախորդ տարվա այս պահի դրությամբ մոտ 3 միլիոն խորանարդ մետրով ավելի:

Կ. Սարգսյանն ասաց, որ նկատվում է մշակվող հողատարածքների ավելացում,  աճել են պայմանագրերի մուտքերը, հայտերի հավաքագրումը: Արդեն պայմանագրեր են կնքել մոտ 114 հազար 500 ջրօգտագործողների հետ, այս պահի դրությամբ արդեն  ջրի կառավարման համակարգ մոտքագրված ունեն մոտ 80 հազար հեկտար: Մշակվող հողատարածքների ավելացում հիմնկանում նկատել են նախալեռնային շրջաններում: