Ձեր վստահելի աղբյուրը

Վարչապետի աշխատակազմի ղեկավար  Էդուարդ Աղաջանյանը կառավարության նիստում ներկայացրեց Սահմանադրական դատարանի դատավորի պաշտոնում Վահրամ Ավետիսյանի թեկնածությունն առաջադրելու մասին նախագիծը։

«Ղեկավարվելով Սահմանադրության  166-րդ հոդվածի 1-ին մասով և 213-րդ հոդվածի 3-րդ մասով՝ Հայաստանի Հանրապետության կառավարությունը ո ր ո շ ու մ  է.
1. Սահմանադրական դատարանի դատավորի պաշտոնում առաջադրել Վահրամ Ավետիսյանի թեկնածությունը»,-նախագիծն ընթերցեց նա ու հայտարարեց, որ Ավետիսյանը դահլիճում է, կարող են նրան հարցեր ուղղել։

Վարչապետ Նիկոլ Փաշինյանը խնդրեց Ավետիսյանին մի քանի բառով ներկայացնել իրեն գործադիրի անդամների ու հանրության համար, նաև խոսել հնարավոր ընտրվելու դեպքում իր անելիքների մասին։ Փաշինյանը հիշեցրեց, թեկնածուին ընտրելու է ԱԺ-ն։

Վ. Ավետիսյանը հայտարարեց, որպես ՍԴ դատավորի թեկնածու իր մոտեցումները պատկերացնում է այսպես՝ առավելագույնս ապահովել ՍԴ դատավորի անկախությունը, անաչառությունը, ապաքաղաքականացվածությունը։

«Հաշվի առնելով երկրում ձևավորված իրողությունները՝ նաև ամրապնդել ՍԴ դատարանի դերը ժողովրդավարության ամրապնդման գործում»,-ասաց նա՝ ավելացրեց, որ ժողովրդավարական արժեքները կարծրացած արժեքներ չեն, դրանք էվոլուցիա են ապրում, իսկ ՍԴ-ն պետք է գործի այդ տրամաբանությանը համապատասխան։

Ասաց՝ չի տեղեկացվել, որ ելույթ պետք է ունենա, հարցերի դեպքում, կպատասխանի դրանց։ Իր գնահատականներն ու մոտեցումները հանգամանալից կներկայացնի ԱԺ-ում։

Փաշինյանը խնդրեց, որ ՍԴ դատավորի թեկնածուն ներկայացնի կենսագրությունը։ Ավետիսյանն էլ մասնավորապես ասաց՝ մասնագիտական գործունեությունը սկսկել է 1999-ից դատախազությունում ավագ քննիչ է աշխատել, հետո ՌԴ-ում թեկնածուական է պաշտպանել, անցել դասախոսական աշխատանքի։ 2002 թվականից դասավանդում Է ԵՊՀ-ում, քաղաքացիական իրավունքի ամբիոնի վարիչն է։ Զուգահեռ զբաղվել է մասնավոր պրակտիկայով՝ տարբեր ընկերություններում եղել է իրավախորհրդատու։

«Կարծում եմ, որ ունեմ բավարար գիտելիքներ, կամ ավելի կոնկրետ անհրաժեշտ մասնագիտական գիտելիքներ, կենսափորձ ու անհրաժեշտ սկզբունքայնություն, որպեսզի կարողանամ պատշաճ ձևով իրականացնել ՍԴ դատավորի պարտականությունները»,-ասաց նա։

Փաշինյանն ավելացրեց՝ իրավագիտության դոկտոր է, Ավետիսյանը հիշեց՝ նաև պրոֆեսոր է։

Նախագիծը դրվեց քվեարկության, ոչ մի դեմ չեղավ։ Վարչապետը հաջողություն մաղթեց նրան ԱԺ-ում քննարկումների ժամանակ, ինչպես նաև ընտրվելուց հետո՝ ՍԴ-ում աշխատանքի։

Ավետիսյանը  շնորհակալություն հայտնեց՝ վստահության համար, ասեց ամեն ինչ անելու է ՍԴ հանրային հեղինակությունը բարձրացնելու, անաչառությունն ապահովելու համար։