Ձեր վստահելի աղբյուրը

«Հաշվարկների արդյունքում կարողացել ենք վեր հանել, որ շուրջ 150 մլն դրամի վնաս է հասցվել և առաջարկվում է հրատապության կարգով  25 մլն դրամ տրամադրել Տվուշի մարզպետարանին»,- կառավարության այսօրվա նիստում հայտարարեց  Տարածքային կառավարման և ենթակառուցվածքների նախարար Սուրեն Պապիկյանը  և իր ներկայացրած նախագծով առաջարկեց արագ տրամադրել այդ գումարը:

Նախարարն առաջարկեց է գումարի մի մասը կանխավճարով հատկացնել՝ աշխատանքը արագ սկսելու համար, որը նաև բարոյական կարևոր նշանակություն կունենա,  իսկ մյուս մասը տրամադրել վնասների ամբողջական գնահատումից հետո:

ՀՀ քաղաքաշինության կոմիտեի նախագահի պաշտոնակատար Արմեն Ղուլարյանը տեղեկացրեց, որ յոթ տան վերականգնման աշխատանքներն արդեն ընթացքի մեջ են, տասը տուն էլ մաքրման աշխատանքների փուլում է:

Վերջինս տեղեկացրեց, որ յուրաքանչյուր գյուղում կա մեկական առավել վնասված տուն և պետք է առաջին հերթին Չինարիի տան վերականգնման աշխատանքներն իրականացվեն, որի ընտանիքը տասը հոգուց է բաղկացած, նրանք 5 երեխա ունեն:

Վարչապետ Նիկոլ Փաշինյանն էլ իր կողմից տեղեկացրեց, որ Կառավարության նախորդ նիստի դռնփակ հատվածում քննարկել են և եկել այն եզրակացության, որ այն բնակելի տները, որոնք հուլիսյան դեպքերի հետևանքով ավերվել են և հնարավոր չէ վերականգնել, պետբյուջեի միջոցներով պետք է վերականգնվեն: