Ձեր վստահելի աղբյուրը

Մեծ Բրիտանիան Pfizer և BioNTech ընկերությունների հետ կնքել է 30 միլիոն չափաբաժին պատվաստանյութ գնելու մասին պայմանագիր: Լոնդոնը պայմանագիր է կնքել նաև ֆրանսիական Վալներա ընկերության հետ, որից կստանա ևս 60 միլիոն չափաբաժին: Առաջին հաջող արդյունքներից հետո կգնի ևս 40 միլիոն: Այս մասին գրում է Ամերիկայի Ձայնը։

Ավելի վաղ հայտարարվել էր AstraZeneca-ից 100 միլիոն չափաբաժին ստանալու շուրջ կնքված պայմանագրի մասին:

Կովիդ 19 հիվանդության դեմ դեռևս չկա հաստատված որևէ պատվաստանյութ, և փորձագետներն ասում են, որ իրենց հույսն այս հիվանդության դեմ պայքարում միայն պատվաստանյութն է:
Ինչ վերաբերում է ԱՄՆ-ին, ապա այն մոտ 2 միլիարդ դոլար է հատկացնելու Pfizer և գերմանական BioNTech ընկերություններից պատվաստանյութ գնելու համար: Յուրաքանչյուր պատվաստում, որը հավանաբար կազմված կլինի երկու ներարկումներից, մոտավոր հաշվարկով արժենալու է 39 դոլար:

Նշված ընկերությունները պետական գումարներ չեն ստանա, քանի դեռ պատվաստանյութը չի տվել դրական արդյունք կլինիկական լայնածավալ փորձերի ընթացքում: Մինչև 500 միլիոն չափաբաժին պատվիրելու դեպքում Pfizer-ը հավելյալ բանակցություններ կվարի գնի շուրջ:

Վաղ փորձարկումների փուլում այս պատվաստանյութը ցույց է տվել դրական արդյունք, մարդու օրգանիզմում արտադրվել է կորոնավիրուսի դեմ պայքարող հակամարմին:

Pfizer-ից գնումներ կատարելու մասին հայտարարությունները դրամական շուկայում այս ընկերության արժեթղթերի գինը բարձրացրել են հինգ տոկոսով: