Ձեր վստահելի աղբյուրը

Հուլիսի 24-ի գիշերը Մոսկվայի Լյուբլինի և Բրատիսլավայի փողոցներում տղամարդկանց խմբերը ծեծի էին ենթարկել հայկական համարանիշներով մեքենաներում եղած մարդկանց և ջարդել մեքենաները: Տեղի հայկական համայնքի անդամները սոցիալական ցանցերով պատասխան գործողությունների կոչեր են անում:

ՌԴ-ում ՀՀ դեսպան Վարդան Տողանյանը հայտարարություն է տարածել, որում կոչ է արել չպատասխանել ադրբեջանցիների սադրանքներին, քանի որ նրանք հենց պատասխան գործողությունների ակնկալիքով են թեժացնում մթնոլորտը:

ՌԴ-ում Հայաստանի դեսպանի տարածած ուղերձում ասվում է.

«Սիրելի հայրենակիցներ

Վերջին օրերին դեսպանատունը ամեն րոպե տեղեկատվություն է ստանում քաղաքացիների կողմից տարբեր միջոցառումների կազմակերպման մտադրության մասին, սոցիալական ցանցերում որոշ օգտատերեր կոչ են անում հավաքվել Մոսկվայի այս կամ այն մասում և Ռուսաստանի Դաշնության այլ քաղաքներում:

Կիսելով ձեզանից յուրաքանչյուրի մտահոգությունն ու հուզական վիճակը՝ պետք է նշեմ, որ ստեղծված իրավիճակում նման կոչերը չեն կարող նպաստել մեր առջև ծառացած հարցերի լուծմանը:

Այս կապակցությամբ, ես յուրաքանչյուրիդ խնդրում եմ չմասնակցել որևէ նախաձեռնության, ակցիայի կամ հանդիպմանը: Հենց այդպիսի պատասխան գործողությունների հանար էին հաշվարկված հասարակության մեջ լարվածությունը թեժացնող կողմի սադրանքները:

Ես նաև խնդրում եմ նման կոչերով հանդես չգալ սոցիալական ցանցերում, չտարածել տեսանյութեր և լուսանկարներ, որոնք կարող են նպաստել արդեն իսկ լարված իրավիճակի սրմանը, ցանկացած իրավիճակում պահպանեք զգոնությունը:

Այս իրավիճակում մենք պետք է ավելի միասնական լինենք, հանդես գանք ընդհանուր դիրքերից, համակարգենք մեր գործողությունները և կանխենք սադրիչ ցանկացած դրսևորում:

Մենք օպերատիվ ձևով շարունակում ենք աշխատել և մշտական կապի մեջ ենք մեր համայնքային կառույցների և Ռուսաստանի իշխանությունների հետ:

Ձեր հետ մեր ընդհանուր խնդիրն է գործել Ռուսաստանի օրենսդրության շրջանակներում»: