Ձեր վստահելի աղբյուրը

Կրթության, գիտության, մշակույթի և սպորտի նախարարությունը չի ուզում ընդառաջ գնալ բարձր միավորներ ստացած, բայց բուհ չընդունված դիմորդների առաջարկություններին: Լրագրողների հետ հանդիպմանն ասաց դիմորդների ծնողներից մեկը: Նա նշեց, որ իրենք շարունակելու են իրենց ակցիաները՝ պահանջելով վերականգնել իրենց երեխաների սովորելու իրավունքը, քանի որ որոշ պետական այրերի կողմից այն ոտնահարվել է, միևնույն ժամանակ փոխել են նաև իրենց ռազմավարությունը:

«Քանի որ  ԿԳՄՍ նախարարությունը նախարարի գլխավորությամբ չի ուզում լուծել մեր զավակների իրավական պահանջը՝ սովորել բուհում, մենք որոշեցինք մեր երեխաների իրավական պահանջն արդեն ներկայացնել դատական ատյաններ»,- նշեց ծնողը:

Նա հայտնեց, որ իրենց «Կոնտրա Լեգեմ» փաստաբանական գրասենյակը տնօրեն  Ալեքսանդր Կոչուբաևի գլխավորությամբ իր աջակցությունն էր հայտնել ու պատրաստակամություն հայտնել պաշտպանելու իրենց շահերը դատական ատյաններում: Ծնողը նաև ասաց, որ երկուշաբթի օրը երեխաների հետ միասին ծնողները ԿԳՄՍ նախարարության մոտ ակցիա են կազմակերպելու՝ պահանջելով նախարարի հետ հանդիպում, միայն նախարարի հետ:

«Ըստ երևույթին, նախարարը փոխնախարար Գրիշա Թամրազյանին հանձնարարում է, որպեսզի նա փորձի մեզ համոզել իրենց տարբերակները, որն ընդհանրապես կապ չունի մեր առաջարկի հետ: Փորձում են մեզ հեռակա տարբերակներ առաջարկել: Ինչպես բոլորդ գիտեք, օգոստոսից, այսպես թե այնպես, հեռակայի ընդունելություն է լինելու: Մեզանից ո՞վ չգիտի, որ իր միավորով կարող է հեռակայի քննությանը մասնակցել: Դառնում է՝ մեզ ձեռ առած, կարծես լուսնից ենք իջել, ոչ մի բանից տեղյակ չենք, իրենք էլ փորձում են մեր խնդրին լուծում տալ՝ առաջարկելով հեռակա: Պարոն ԿԳՄՍ նախարար, ուշադիր հետևեք մեր ելույթներին ու փորձեք ճիշտ մոտեցում ցուցաբերել»,- նշեց նա՝ հավելելով, որ իրենց երեխաներն այսօր նման խնդրի առաջ են կանգնել, քանի որ պատշաճ չեն ծանուցվել, այդ ամենում մեղավորը ԿԳՄՍ նախարարն է:

Ասուլիսին ներկա Ալեքսանդր Կոչուբաևն ասաց, որ  ժամանակը թեև բավականին կարճ է, բայց մեծ անելիքներ ունեն, մի քանի հնարավոր լուծումներ, մի քանի միաժամանակյա գործընթացներ են նախաձեռնելու:

Նա նշեց, որ նորմատիվ իրավական ակտի մասին ծանուցումը պատշաճ չի եղել: Փաստաբանն ասաց, որ չորեքշաբթի կառավարության ընդունած  որոշումը, որով ընդունվելու նոր կարգ է սահմանվել, կվիճարկեն վարչական դատարանոմ հատուկ վարույթի կարգով նորմատիվ իրավական ակտի իրավաչափությունը վիճարկվող մեխանիզմների շրջանակներում:

«Չեմ կարող ասել՝  կառավարության ընդունած  որոշումն իրավական անգրագիտության, թե մշակված քաղաքականության արդյունք է, սակայն հակասում է մի շարք օրենքների: Այն, ինչ ընդունել է կառավարութունը, նաև ստեղծում է հակասահմանադրական իրավիճակներ, մենք մշակել  ենք հակաքայլեր»,- նշեց բուհեր չընդունված դիմորդների փաստաբանը։

Ա.Կոչուբաևը նաև ասաց՝ քննարկում են և հստակ դիրքորոշում ունեն, որ մյուս շաբաթվա մեջ իրենք կլինեն նաև Սահմանադրական դատարանում, ՄԻԵԴ-ում:

Փաստաբանը նշեց, որ եթե մինչև օգոստոսի 31-ը ներառյալ դիմորդների կրթության սահմանադրական իրավունքը չվերականգնվի, այլևս անարդյունավետ կլինի առաջին ատյանի, վերաքննության, վճռաբեկության փուլերը. «Մենք այդ ատյանները պարզապես շրջանցում ենք, քանի որ դրանց դիմելը ոչ արդյունավետ գործիք է լինելու»:

«Կա կառավարության թերացում իրավական դաշտում, կա նախարարության թերացում և կա իրավակիրառ թերացում»,- ընդգծեց Ալեքսանդր Կոչուբաևը:

Հիշեցնենք, որ արդեն մի քանի օր է բուհ չընդունված դիմորդները և նրանց ծնողներն բողոքի ակցիաներ են անցկացնում ԿԹԿ-ի, կառավարության, ԿԳՄՍ նախարարության դիմաց: Բարձր միավորներ հավաքած դիմորդները չեն ընդունվել բուհ, քանի որ առաջին հայտով լրացված բաժիններում տեղ չի եղել, իսկ այս տարի առաջնությունը տրվել է առաջին հայտին: Նրանք առաջարկում էին տեղեր ավելացնել բարձր միավորներ ստացած դիմորդների համար