Ձեր վստահելի աղբյուրը

«Ցանկացած նորմատիվ իրավական ակտ, որը կարող է վատացնել անձի վիճակը պետք է ունենա հնարավորություն ողջամիտ ժամկետում ուժի մեջ մտնելու: Այս կառավարությունը «Նորմատիվ իրավական ակտի մասին» օրենքի պահանջների համաձայն, այդ նորմը չի պահպանել»,- մամուլի ասուլիսում հայտնեց փաստաբան Զարուհի Փոստանջյանը՝ անդրադառնալով բարձր բալեր միավորներ ստացած դիմորդների՝ ԲՈւՀ-երից դուրս մնալու խնդրին:

Վերջինս նկատեց, որ դիմորդները տարիներ շարունակ հնարավորություն են ունեցել դիմելու տարբեր ֆակուլտետներ և, ստանալով բարձր միավորներ, կարող էին անցնել հայտում լրացրած որևէ բաժին, որը մինչև հիմա շարունակում է գործել։

Փոստանջյանի խոսքով՝ այս նորմատիվ իրավական ակտն ուժը կորցրած չի ճանաչվել, սակայն 2020թ մայիսի 21-ին կառավարությունն ընդունել է մի որոշում, որով փոխել է այդ ընդունելության կարգը՝ անդրադարձ չկատարելով նախկինում իր կողմից ընդունած որոշումներին և օրենքին։

Նա համոզված է, որ Կառավարությունը նման իրավասություն չուներ, քանի որ այդ որոշումը պետք է համապատասխանի Սահմանադրությանը և «Նորմատիվ իրավական ակտերի մասին» օրենքին, պետք է անցկացվեր պետաիրավական փորձաքննություն, որի հիման վրա տրվեր եզրակացություն, թե արդյոք այդ կարգը, որը կառավարությունը պատրաստվում է ընդունել, կարող է հակասության մեջ գտնվել Սահմանադրության կամ նորմատիվ իրավական ակտերի հետ:

Բանախոսը կարծիք հայտնեց, որ եղել է նման բացասական եզրակացություն համապատասխան կառույցների կողմից:

Զարուհի Փոստանջյանը տեղեկացրեց, որ դիմորդների մեծ մասն իրենց հայտերը լրացրել են հին կարգի դրույթներին համապատասխան, այսինքն՝ հայտագրումը տեղի է ունեցել հին կարգի դրույթներին համապատասխան, սակայն հետագայում քննությունների ամփոփումը տեղի է ունեցել արդեն նոր կարգի դրույթներին համապատասխան, ինչը սխալ է:

Անդրադառնալով ԿԳՄՍ նախարարի հայտարարությանը, թե նա փոփոխությունների մասին իրազեկել է ուղիղ եթերի միջոցով՝ Փոստանջյանն ասաց, որ ուղիղ եթերն այսօր պետության կողմից ճանաչված իրազեկման միջոց չէ, ծանուցումը պետք է լինի պաշտոնապես, բացի այդ, պետք է տրամադրել նաև ողջամիտ ժամկետ՝ ակտն ուժի մեջ մտնելու համար, մինչդեռ, այդ օրենքն այդ կերպ էլ ուժի մեջ է մտել։

«Հերիք է լայվերով որոշումներ կայացնեք և մտածեք, որ դրանք իրազեկման միջոց են, սա ձեզ համար «շոու-պրոգրամա» չէ, որ ձեր անձնական ֆեյսբուքյան միջոցով մտնեք լայվ ու երկրի հարցերը լուծեք»,- նկատեց Փստանջյանը և հավելեց, որ 1000-ից ավելի երիտասարդ դիմորդի զրկել են կրթություն ստանալու իրավունքից և այդ կոռուպցիոն սխեմայի համար պետք է պատասխան տան:

Նա հայտարարեց, որ դատարան կհրավիրվեն ոչ միայն ԿԳՄՍ նախարար Արայիկ Հարությունյանը, այլ նաև Նիկոլ Փաշինյանը, քանի որ վերջինիս ձեռամբ է այդ կեղծիքը կատարվել:

Ըստ բանախոսի, պետք է գործեր նախկին նորմը, իսկ նոր նորմը հակասում է Սահմանադրության՝ կրթության իրավունքի խրախուսման նորմին, հետևաբար այն չի կարող տարածվել այն դիմորդների վրա, որոնք տուժել են այս որոշումից: