Ձեր վստահելի աղբյուրը

Apple-ի համահիմնադիր Սթիվ Վոզնյակը և 17 այլ անձինք Google-ի պլատֆորմի YouTube-ի դեմ դատական հայց են ներկայացրել Կալիֆոռնիայի Գերագույն դատարան, ըստ որի, այդ ծառայության հարթակում տեղադրված են տեսանյութեր, որոնցում Վոզնյակի անունը օգտագործվել է Bitcoin-ի կեղծ սխեմաների մեջ: Ըստ «ՌԻԱ նովոստի»-ի, այդ մասին ասված է դատական գործի նյութերում:

«YouTube-ում տեղադրվում են կեղծ տեսանյութերի և գովազդերի մշտական հոսքեր, որոնցում օգտագործում են հայցվոր Սթիվ Վոզնյակի և տեխնոլոգիաների բնագավառում նշանավոր այլ ձեռնարկատերերի կեղծ պատկերներն ու տեսանյութերը և խաբեությամբ միլիոնավոր դոլարներ են հափշտակվում YouTube-ի օգտատերերից»,- ասվում է հայցի տեքստում:

Ըստ հայցվորների, ծառայության վրա դրված տեսանյութերում խարդախները պատմել են, թե իբր Apple-ի համահիմնադիրը bitcoin է բաժանում: Տեսանյութերում պնդում են, որ եթե օգտատերերը որոշակի քանակությամբ bitcoin ուղարկեն համապատասխան հասցեին, ապա Wozniak-ը դրանք կրկնակի կվերադարձնի:

Հայցում առկա են YouTube-ի պլատֆորմի սքրինշոթեր՝ համապատասխան տեսանյութերով: Նաև նշվում է, որ կեղծարարներն օգտագործել են այլ հայտնի ձեռներեցների անունները, ինչպիսիք են Իլոն Մասկը, Բիլ Գեյթսը և Ռոբերտ Կիոսակին:

Հայցվորները պնդում են, որ YouTube-ը տեղյակ է այդ խարդախություններից, բայց քայլեր չի ձեռնարկել տեսանյութերը հեռացնելու ուղղությամբ: