Ձեր վստահելի աղբյուրը

ՀՀ նախագահի աշխատակազմի նախկին ղեկավար Արմեն Գևորգյանի գույքի վրա կալանք դնելու համար որևէ իրավական հիմք ու նպատակ գոյություն չունի։ Երևանի ընդհանուր իրավասության դատարանում դատավոր Աննա Դանիբեկյանի նախագահությամբ ընթացող նիստի ժամանակ հայտարարեց Գևորգյանի պաշտպան Էրիկ Ալեքսանյանը։

Նա նկատեց, որ կալանք է դրվել Արմեն Գևորգյանի ողջ գույքի վրա, մինչդեռ նշված նպատակները որոշակիացված չեն, որևէ փաստական տվյալ քննիչի որոշման չկա։ Նա նկատեց, արգելանք է դրվել նաև Արմեն Գևորգյանի հոր և եղբոր ամբողջ գույքի վրա, այս պարագայում էլ, ըստ փաստաբանի, նպատակները որոշակիացված չեն, տվյալ անձինք այս գործով դատավարական մասնակից չեն, որևէ կապ չունեն գործի հետ, ուստի խախտվել են նրանց սեփականության իրավունքները։

Էրիկ Ալեքսանյանը միջնորդեց դատարանին վերացնել Գևորգյանի ողջ գույքի վրա դրված կալանքը, ներկայացնելով Սամվել Մայրապետյանի գործով նախադեպային որոշումը։ Նրա միջնորդությանը միացավ պաշտպանական կողմը։

Միջնորդություն ներկայացնելուց հետո ՀՀ երկրորդ նախագահ Ռոբերտ Քոչարյանի փաստաբանական թիմի անդամ Հովհաննես Խուդոյանը դատարանին խնդրեց շնչելու հնարավորություն տալ։ 

Հայտարարվեց 15 րոպե ընդմիջում։

Սահմանադրական կարգի ենթադրյալ տապալման գործով այսօրվա նիստին ՀՀ երկրորդ նախագահ Ռոբերտ Քոչարյանի պաշտպանական թիմը ևս միջնորդեց վերացնել Քոչարյանի գույքի վրա դրված արգելանքը։

Պաշտպան Հովհաննես Խուդոյանը նշեց, որ 2018 թ․ հուլիսի 30-ին քննիչ Հրաչյա Մուշեղյանը որոշում է կայացրել արգելանք դնել Քոչարյանի շարժական և անշարժ գույքի, դրամական միջոցների, հաշիվների, բաժնեմասերի, ակտիվների, բաժնետոմսերի, արժեթղթերի վրա։ Ընդ որում, արգելանքը դրվել է առանց հաշվի առնելու՝ արդյո՞ք Քոչարյանն ունի բաժնետոմսեր, արժեթղթեր կամ որևէ ակտիվներ։

Խուդոյանն էլ նկատեց, որոշման մեջ առկա չեն պատշաճ պատճառաբանություններ, մինչդեռ կալանք են դրել Ռոբերտ Քոչարյանի ամբողջ գույքի վրա, նույնիսկ այն գույքի, որի վրա կալանք դնելու իրավունք չկար։

Խուդոյանը հիշեցրեց, որ ընդհանուր իրավասության դատարանն արձանագրել է, որ Ռոբերտ Քոչարյանի իրավունքները խախտվել են, վերաքննիչը ևս հաստատել է այն։

«Շուրջ մեկ տարի ՀՀ դատարանի կողմից ճանաչված խախտումը չի վերացվել, մինչդեռ, դուք հարգելի դատարան, պարտավոր էիք օպերատիվ կերպով արձագանքել, կամք դրսևորել այն վերացնելու համար՝ անկախ ներկայացված միջնորդությունից։ Հիմա մենք խնդրում ենք դատարանին, որպեսզի այնպես անի, որ այդ անօրինական ակտի հետևանքները պարոն Քոչարյանը չկրի»,- ասաց Խուդոյանը։

Մեղադրող կողմն առարկեց՝ դատարանին խնդրելով մերժել միջնորդությունները։