Ձեր վստահելի աղբյուրը

«Իրատես» թերթը գրում է. ««Իմ քայլը» խմբակցության պատգամավոր Հայկ Սարգսյանը «ժանտախտի ժամանակ խրախճանք» է նախաձեռնել: Սևանի լողափերից մեկում, որը, ըստ տարածվող տեղեկությունների, իրեն է պատկանում, հարյուրավոր մարդկանց է հրավիրել ու «փարթի» կազմակերպել: Ներկաները ո՛չ դիմակ են կրել, ո՛չ սոցիալական հեռավորություն պահել, ավելին՝ պարետի կողմից արգելված նարգիլեն էլ վայելել են վերադիր: Այս ամենի համար Հայկ Սարգսյանը որևէ պատասխանատվության չի ենթարկվելու: Լրագրողների հետ զրույցում «Իմ քայլը» խմբակցության ղեկավար Լիլիթ Մակունցը տեղեկացրել է՝ հավաքույթը Սարգսյանը չի նախաձեռնել: «Հայկ Սարգսյանն ինձ տեղեկացրեց, որ ինքը որևէ միջոցառում չի կազմակերպել, մի քանի օրով գտնվում է հանգստյան գոտում, որտեղ այլ քաղաքացիներ ևս հանգստանում են։ Տեղեկացրեց, որ դիմակ չդնելն անզգուշություն է եղել: Հայկ Սարգսյանը հայցում էր «Իմ քայլը» խմբակցության ներողամտությունը։

Իմ տեղեկություններով, նա պետք է որ արդեն տուգանված լինի, անկախ նրանից, որ դա եղել է անզգուշություն: Հայկ Սարգսյանը հերքել է նաև, թե որևէ կապ ունի միջոցառման կազմակերպման և հանգստյան գոտու հետ»,- ասել է Մակունցը: Լիլիթ Մակունցի ասածների մեջ ճշմարտություն կփորձեինք փնտրել, եթե համացանցում տարածվող տեսանյութերն ու լուսանկարները ճիշտ հակառակը չապացուցեին: Եթե Հայկ Սարգսյանն ընդամենը մի պահ է եղել այդ «օբյեկտում», ապա ինչպե՞ս է ստացվում, որ նա ներխուժում է ուրիշի համակարգչի մեջ, տիրոջ իրավունքով կանգնում բարմենի սեղանի մոտ և այլն: Պարզից էլ պարզ է՝ հանգստի գոտին պատգամավորինն է, ու նա թքած ունի պարետի որոշումների վրա: Մենք իհարկե դեմ չենք, որ մարդիկ վայելեն հանգիստը, զվարճանան, բայց օրենքը բոլորի համար է: Հայկ Սարգսյանն այս անգամ էլ ջրից չոր դուրս կգա, նրան կտուգանեն 10 հազար դրամով, ու վերջ: Պատգամավորի կյանքում նոր «դեբոշներ», վստահ եմ, նորից են լինելու, ու քանի դեռ նա վայելում է իշխանության հոգածությունը, վայելելու է կյանքը՝ թե՛ ժանտախտի, թե՛դրանից հետո եկող բոլոր օրերին:

Ի տարբերություն Լիլիթ Մակունցի, «Այլընտրանքային նախագծեր» խմբի անդամ Մարինե Սուքիասյանն այն համոզմանն է, որ Փաշինյանի մերձավոր շրջապատի անդամ պատգամավորը պետք է վայր դնի մանդատը։ Խնդիրը ոչ այնքան հակահամաճարակային պայմանների խախտումն է, ասում է Սուքիասյանը, որքան պարետատան ու անձամբ Փաշինյանի հորդորների և կոչերի անտեսումը։ «Սա իհարկե, կարևոր է, բայց կա ավելի էական պահ. Հայաստանը դեռ ապրում է Տավուշի ռազմական գործողությունների ազդեցության, ռիսկերի փուլում։ Մենք ունենք զոհեր, որոնց յոթը, քառասունքը չի անցել, մենք ունենք վիրավորներ, որոնց մասին արդեն փորձում ենք մոռանալ, և, եթե նկատել եք, նրանց առողջական վիճակի մասին լրահոսը գնալով դառնում է կցկտուր,- նշում է նա ու հավելում,- Այս պայմաններում իշխանական էլիտայի անզուսպ հաճույքներն ուղղակի վիրավորանք են մեր տղաների հասցեին։ Ստացվում է, որ կռիվը՝ կռիվ, ու մի քանի օր անց սկսու՞մ ենք մեր քեֆերը։ Եթե դա արվեր հասարակ քաղաքացիների կողմից, ապա կարելի էր լինել ներողամիտ, և այդ ամենը վերագրել անհատական դաստիարակության խնդիրներին։ Բայց խոսքն իշխանական նեղ էլիտայի ներկայացուցչի մասին է, և սա արժեհամակարգային խնդիր է։ Կա՛մ Փաշինյանը Հայկ Սարգսյանի հետ է իր իրական արժեքներով, կա՛մ Փաշինյանը ցույց է տալիս, որ իր համար նույնպես մերժելի են ռազմական գործողություններից ու հերոս զոհերից հետո նման անպարկեշտ քեֆերը»:

Համավարակային կանոնները խախտելու հարցում Հայկ Սարգսյանը միակը չէ: Օրերս յուրօրինակ մի խնջույք էլ մարզպետներն են նախաձեռնել՝ Դեբեդի վրա «նավարկություն» կազմակերպելով: Գետը նավակով հերոսաբար կտրած-անցած մարզպետները, անշուշտ, հակահամաճարակին որևէ կանոն չեն պահպանել։ Բոլոր դեպքերում, սարսափելին այն է, որ, ի տարբերություն հեղափոխական քայլիստների, «տուգանքի մատերիալ» սովորական մահկանացուներն են դառնում. երիտասարդ տղան, օրինակ, որ հանդգնում է համբուրել սիրած աղջկան, կամ ամռան տապից խեղդվող ու մի պահ դիմակը իջեցնող ՀՀ հպարտ ու արժանապատիվ քաղաքացին»։

Մանրամասները թերթի այսօրվա համարում։