Ձեր վստահելի աղբյուրը

«Բոլորս տեսնում ենք բացարձակ թվով և կատարված թեստերի թվով  նոր դեպքերի անկում, որը տեղի է ունենում դանդաղ»- պարետատան նիստից հետո ասաց ՀՀ առողջապահության նախարար Արսեն Թորոսյանը։

«Այս շաբաթ դեռ ամենամեծ թիվը եղել է 308։ Համեմատելով նախորդ շաբաթների թվերի հետ, ակնհայտ է, որ ունենք բարելավում։ Ինչը լավ հնարավորություն է իրավիճակը լավացնելու, որ այլևս ճգնաժամային իրավիճակ չլինի»,-հավելեց Թորոսյանը։

Ինչ վերաբերում է համաճարակային պիկին, ապա Թորոսյանի խոսքով այն եղել է հուլիսի 6-ին։

«Մեր տվյալներով՝ ամենաշատ ակտիվ պացիենտ ունեցել ենք հուլիսի վեցին։  Այսինքն՝ եթե դա համարենք պիկ համաճարակաբանորեն, ապա մեր պիկը եղել է հենց այդ օրը։ Այդ օրվանից հետո ավելի քիչ պացիենտներ ենք ունեցել»,-ասաց Թորոսյանը։

Անդրադառնալով հիվանդանոցային մահճակալների ծանրաբեռնվածությանը, Թորոսյանն ասաց, որ ունենք բազմաթիվ ազատ մահճակալներ։ Հետևաբար մի շարք  ԲԿ-ներ կվերադառնան իրենց բնականոն աշխատանքին։

«Վանաձորի ինֆեկցիոն հիվանդանոցը, Վեդու բժշկական կենտրոնը և Դիլիջանի բժշկական կենտրոնը օգոստոսի մեկից կվերադարձնենք իրենց հիմնական աշխատանքին։ Եվս  3 բժշկական կենտրոններ Երևանում մոտակա 7-10 օրերի ընթացքում համաճարակային իրավիճակի կայունացման նույն տեմպի պահպանման դեպքում նույնպես կվերադառնան իրենց աշխատանքին և այս տրամաբանությամբ  կշարունակենք։ Հավելյալ մահճակալների ֆոնդ չենք պահի, բայց միևնույն ժամանակ 2800-ին մոտ մահճակալային ֆոնդը միշտ պատրաստ է լինելու»,-ասաց Թորոսյանը։