Ձեր վստահելի աղբյուրը

«1988 թվից ի վեր մենք Արցախի հարցի կարգավորումը դիտում էինք ազգերի ինքնորոշմոն սկզբունքի հիմքի վրա։ Սա է Արցախի հարցի լուծման բանալին»,-երեք հեռուստաընկերություններին տված հարցազրույցում հայտարարեց Արցախի առաջին նախագահ, ՀՀ երկրորդ նախագահ Ռոբերտ Քոչարյանը։

Նա հիշեցրեց, որ այս ողջ ընթացքում Ադրբեջանը միշտ փորձել է այս հարցը բերել պետությունների տարածքային ամբողջականության դաշտ, որը մեզ համար անբարենպաստ է։ Այս դաշտում, այս սկզբունքի շրջանակներում այս հարցը Հայաստանի համար բարենպաստ լուծում չունի։

ՀՀ երկրորդ նախագահն ընդգծեց՝ 88-ից ի վեր չի եղել որևէ ադրբեջանցու հայտարարություն, որ Ղարաբաղը կարող է և ինքորոշվել։

«Նման հայտարարություն, նման դեպք չի եղել։ Հիմա իշխանության կողմից առաջ քաշված բանաձևերի համաձայն, կամ Ղարաբաղը պետք է հրաժարվի անկախությունից, կամ Ադրբեջանը պետք է համաձայնվի Ղարաբաղի ամբողջությանը։ Ես ոչ Ադրբեջանում եմ տեսնում նման մտադրություն, ոչ Ղարաբաղում եմ տեսնում նման մտադրություն։ Հիմա հարց է առաջանում, ի՞նչ սկզբունքների շուրջ այս հարցը պետք է ստանա իր լուծումը։ Ինձ համար հասկանալի չէ, և սա մեծ մտահոգություն է առաջացնում ինձ մոտ, քանի որ մենք հնարավորություն ենք տալիս համանախագահներին իմպրովիզացիայի լայն միջանցք ունենալ այս հարցի կարգավորման վերաբերյալ»,-ասաց նա։

Ռոբերտ Քոչարյանը պատահական չի համարում, որ վերակենդանացվում է  ադրբեջանական համայնքի ներկայացուցչի հանգամանքը, պատահական չի նաև, որ Հայաստանի նոր անվտանգության ռազմավարության մեջ չկա Լեռնային Ղարաբաղի Հանրապետություն, Լեռնային Ղարաբաղի  Հանրապետության ժողովուրդ բառը, այլ կա ազգաբնակչություն կամ բնակչություն։

«Սա բավականին հետաքրքիր ձևով կապվում է ադրբեջանական համայնքի ներկայացուցչի վերակենդանանալու հետ։ Պատահականությո՞ւն է սա, թե՞ պատահականություն չէ՞։ Միգուցե պատահականություն է։ Բայց շատ մտահոգիչ պատահականություն է»,-ասաց ՀՀ երկրորդ նախագահը՝ ավելացնելով, իրեն անհգաստացնում է ամեն բան, որը տրամաբանված չէ, քանի որ չտրամաբանված ելույթներում տեսնում ես միտումնավորություն կամ էլ կարգավորման էությունը չհասկանալը, որոնք երկուսն էլ վտանգավոր են ու ձախողումն էլ դառնում է հնարավոր։
Ռոբերտ Քոչարյանն ընդգծում է, պետք է կարդան Արցախի անկախության հռչակագիրը, և բանակցություններում բոլոր քայլերը պետք է բխեն այդ հռչակագրից։

«Ղարաբաղի Հանրապետության ձևավորման իրավական հիմքերն անխոցելի են։ Ամեն ինչի համար ինչ-որ հիմք է պետք, եթե այդ հիմքերը չկան, կամ ամեն օր նոր հիմքեր ես գտնում, կամ մտավարժանքների արդյունքում ասում ես բաներ, որոնք հարցի էության հետ որևէ աղերս չունեն, դրա հետևանքները լավ չեն լինելու։ Կրկնում եմ, վերադառնանք հռչակագրին ու բանակցություններում մեր բոլոր քայլերը տեղավորենք այդ հռչակագրի շրջանակներում։ Այդ դեպքում մենք երբեք խնդիրներք չենք ունենալու, իրար չենք հակասելու, լինելու ենք հետևողական, հասկանալի և կանխատեսելի»,-ասաց նա։

Անդրադառնալով Ադրբեջանի նախագահի այն հայտարարությանը, թե դուրս են գալու բանակցություններից, Ռոբերտ Քոչարյանն այն շանտաժ որակեց։

«Իհարկե բանակցություններն ավելի լավ են, քան որևէ պատերզմ, բայց ենթարկվել շանտաժի, ուղղակի չի կարելի։ Սա այն դեպքն է, որ պետք է սկզբունքայնություն դրսևորվի նույնիսկ ռիսկերի պարագայում։ Մենք 88 թվից միշտ եղել ենք ռիսկային իրավիճակներում, գնացել ենք այդ ռիսկերին և հաջողել ենք։ Ռիսկ կա, շանտաժին չպետք է ենթարկվենք, կապրիզների գերի չպետք է դառնանք երբեք, որևէ պարագայում»,-ընդգծեց նա։

Հարցազրույցն ամբողջությամբ՝ տեսանյութում։