Ձեր վստահելի աղբյուրը

«Ոչ մի դիմորդ պարտավոր չէ առավոտից երեկո հետևի, տեսնի, թե երբ պետք է ԿԳՄՍ-ի նախարարը լայվ մտնի, որպեսզի տեսնի, թե նա ինչ է խոսում»,- ԱԺ Գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովում կազմակերպված ընդունելությանը հայտնեց ԲՈւՀ-երի ընդունելության քննությունների արդյունքում բարձր միավոր ստացած և չընդունված դիմորդների ներկայացուցիչ, դիմորդի ծնող Մասիս Բադալյանը:

Վերջինս նշեց, որ դիմորդները սկսել են հայտերն ուղարկել մայիսի 25-ից, իսկ ընդունելության նոր կարգն ուժի մեջ է մտել մայիսի 26-ից: Նկատելով, որ ԿԳՄՍ նախարարը Պետրոս Ղազարյանի հաղորդման ժամանակ պնդել էր, որ դեռ ապրիլի 30-ին հայտնել է նոր կարգի գործելու մասին՝ դիմորդի ծնողը օրինաչափ հարց բարձրացրեց, թե ինչ իրավունքով է նախարարը հայտնում մի որոշման մասին, որը դեռ չէր ընդունվել, ինչը օրենքի խախտում է:

Ըստ ծնողի, պատշաճ կարգով չի իրականացվել իրազեկում, և ԳԹԿ աշխատակիցները ու ԿԳՄՍ նախարարը թույլ են տվել խախտումներ:

«Թող ԿԳՄՍ նախարարը և ԳԹԿ աշխատակիցները բարի լինեն ընդունել իրենց սխալները, ամոթ բան չէ, այն տղամարդկություն է, շտապել են՝ այդ պատճառով էլ սխալվել են»,- հայտնեց Մասիս Բադալյանը և շեշտեց, որ դրանից հետո պատասխանատուները պետք է ներկայացնեին չընդունված դիմորդների խնդրի լուծումները:

Քաղաքացիները պահանջում են վերականգնել սահմանադրական նորմի պահանջը՝ սովորելու իրավունքը: 87 դիմորդ լիազորագիր է ներկայացրել փաստաբանական խմբին իրենց իրավունքը դատարանում ներկայացնելու համար:

Նշենք, որ դիմորդների խմբին և նրանց ծնողներին ընդունեցին Գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի «Իմ քայլը» խմբակցության անդամ Լիլիթ Ստեփանյանը, «Լուսավոր Հայաստան» խմբակցության պատգամավոր Աննա Կոստանյանը և «Բարգավաճ Հայաստան» խմբակցության պատգամավոր Արման Աբովյանը:

«Մեր բոլոր դիմումները ԿԳՄՍ նախարարին և ԳԹԿ կենտրոնին եղել են ապարդյուն, նրանցից որևէ մեկը չի ցանկացել մեր խնդրին տալ արժանահավատ լուծում: Խնդրում ենք, հարգելի պատգամավորներ, գոնե երկրի օրենսդիր մարմնի միջոցով խնդրին հստակ լուծում տալ»,- կոչ արեց Բժշկական համալսարան դիմած և բարձր բալով չընդունված Արտուշ Հովսեփյանը:

Մասիս Բադալյանն էլ հայտնեց, որ երկու անգամ հանդիպման խնդրանքով դիմել են ԿԳՄՍ նախարարին և մերժվել են:

«Լուսավոր Հայաստան» խմբակցության պատգամավոր Աննա Կոստանյանը հայտնեց, որ միանշանակ կիսում է հնչած տեսակետները, որ թույլ են տրվել սխալներ և հաշվի չեն առել կորոնավիրուսի հանգամանքը, քանի որ եթե մի քանի քննություն լիներ՝ այդ խնդիրը չէր առաջանա:

Պատգամավորը հայտնեց, որ այդ խնդրով նամակ է ուղղել ԿԳՄՍ նախարարությանը:

Դիմորդները պատգամավորներին ներկայացրեցին նաև իրենց լուծումը, ըստ որի, չընդունված դիմորդների համար բուհերում պետք է ավելացվի համապատասխան տեղեր:

«Իմ քայլը» խմբակցության անդամ Լիլիթ Ստեփանյանն էլ հայտնեց, որ երեք խմբակցություններով կդիմեն նախարարությանը: