Ձեր վստահելի աղբյուրը

«Հինգ ամիս տևած արտակարգ իրավիճակի պայմաններում համեմատում ես կորոնավիրուսի հիվանդացության թվերն այն երկրների հետ, որոնք բացարձակապես ոչինչ չեն արել,  օրինակ Բելառուսում, տեսնում ես՝ Հայաստանում իրավիճակն ավելի վատ է»,-երեք հեռուստաընկերություններին տված հարցազրույցում հայտարարեց ՀՀ երկրորդ նախագահ Ռոբերտ Քոչարյանը՝ անդրադառնալով համավարակի պայմաններում  իշխանության քայլերին, թերացումներին։

Թե ինչու է Հայաստանում իրավիճակն ավելի վատ, քան այն երկրում, որտեղ ոչինչ չի արվել, հարց է հնչեցնում Քոչարյանն ու խոստովանում՝ ինքն այդ հարցի պատասխանը չունի։

Նա հիշեցրեց, որ հարևան չորս երկրներից միայն երկուսի հետ Հայաստանը բաց սահման ունի, համավարակի ժամանակ կարելի էր երկիրը փակել ու խուսափել այս իրավիճակից, բայց չստացվեց։

«Միակ դեպքը, երբ մասնակի շրջափակումը կարող էր առավելություն դառնալ երկրի համար, չաշխատեց»,-նշեց նա։

Նրա խոսքով, սխալները սկսել են հենց սկզբից, երբ նախապատրական աշխատանքներ չեն արվել, սխալ մեսիջներ են եղել, հակասական հայտարարություններ ու որոշումներ։

«Զավեշտալի երևույթներ, որոնք վիճակի լրջության հետ որևէ կապ չունեին։ Ամենից անընդունելին ինձ համար փորձն է մեղադրել ժողովրդին դիմակ չկրելու մեջ։ Նույնսիկ որոշ մարդկանց մոտ կոմպլեքս է առաջնում, մարդիկ մտածում են՝ իրենք են մեղավոր, կազմակերպված չեն։ Ես գիտեմ, որ հայերն աշխարհի ամենակազմակերպված ու ամենակարգապահ ազգը չեն, բայց ես մեզ չեմ համեմատում գերմանախոս ազգերի հետ,  ես համեմատում եմ հույների ու վրացիների հետ, որոնց մեր կենցաղային մշակույթը շատ նման է։ Ու երբ համեմատում ես մեր թվերը Հունաստանի կամ Վրաստանի թվերի հետ, ուղղակի ապշում ես, ոչ հույները, ոչ վրացիները մեզանից կարգապահ չեն, ինչի՞ ենք մենք այս վիճակում, երբ նրանց մոտ սահմանները բաց են, տուրիստների քանակը շատ ավելի մեծ է։ Պատճառը մեկն է՝ ձեռնարկած քայլերն ու կառավարման արդյունավետությունը, ուրիշ բացատրություն ուղղակի չկա։ Չպետք է մենք ժողովրդին ասենք՝ դու ես մեղավոր, դու ես մեղավոր»,-ասաց նա։

ՀՀ երկրորդ նախագահն անհասկանալի է համարում այն, որ երկու ամսում դիմակ չկրելու համար ավելի շատ մարդ է  տուգանվել, քան իր կառավարման տասը տարիների ընթացքում։

«Բայց խոսքի տակին- գլխին՝  ժողովուրդ մենք ձեզ սիրում ենք, մենք ձեզ սիրում ենք։ Մի սիրի, բայց ճիշտ կառավարի, որ 900 հոգի չմահանա, կամ եթե սիրում ես, մի խոսա դրա մասին, ճիշտ կառավարի։ Հիմա թող այդ սիրված, ասֆալտին փռված հպարտ քաղաքացին մտածի, թե ինչու է երկիրը հանձնել, վստահել այդ կառավարությանը։ Ուղղակի սա անհարգալից վերաբերմունք է սեփական ժողովրդի նկատմամաբ, բա ինչի՞ համար է կառավարությունը։ Վաղն էլ տնտեսական անհաջողությունների մեղքն ենք բարդելու ժողովրդի վրա, վաղը պատերազմ լինի հանկարծ կամ խնդրահարույց բաներ, պարզ է՝ ով է մեղավոր, մեր սիրած ժողովուրդն է մեղավոր, որովհետև անկազմակերպ է։ Ի դեպ, Հարավային Կովկասում մենք ամենակազմակերպված ազգն ենք»,-նշեց նա։

ՀՀ երկրորդ նախագահը պատահական չի համարում, որ հասարակության շրջանում վատատեսությունը մեծանում է՝ կան հիմքեր։

«Առիթ չկա լավատեսություն ունենալու համար։ Սա տանելու է դեպրեսիվ, ապագայի նկատմամբ թերահավատություն ունեցող հասարակություն ունենալուն։ Իսկ դա ազդելու է ամեն ինչի վրա՝ տնտեսական ցուցանիշների, վատ տրամադրված, պեսիմիզմով հասարակությունը չի կարող ստեղծագործ լինել, արդյունավետություն ունենալ»,-կարծիք հայտնեց Ռոբերտ Քոչարյանը։

Հարցազրույցն ամբողջությամբ՝ տեսանյութում։