Ձեր վստահելի աղբյուրը

«Անարդյունավետ աշխատանքի պատճառով կառավարությունը ձախողել է կորոնավիրուսի դեմ պայքարը»,- մամուլի ասուլիսում հայտարարեց ոստիկանության գնդապետ Սայաթ Շիրինյանը և հավելեց, որ վերջին ժամանակահատվածում իշխանությունները փորձում են ձախողումները բարդել ժողովրդի վրա:

Բանախոսը նկատեց՝  ՀՀ երկրորդ նաագահ Ռոբերտ Քոչարյանն իր վերջին հարցազրույցում շեշտել է, որ Հարավային Կովկասում հայի նման կազմակերպված ազգ գոյություն չունի, իսկ գործող վարչապետը փորձում է հակառակը ապացուցել:

Շիրինյանը հայտնեց, թե դա այն դեպքում, երբ մարտի 1-ին պաշտոնապես արձանագրվել էր կորոնավիրուսի վարակի առաջին դեպքը, իշխող ուժը մինչև մարտի 12-13-ը շարունակում էր իր «Այո»-ի քարոզչությունը:

«Քանի որ իշխանությունները սևեռված էին իրենց կպչուն մտքերին, որպեսզի Սահմանադրական դատարանը բռնազավթեին»,- հավելեց ոստիկանության գնդապետը:

Վերջինս կասկածի տակ դրեց պաշտոնական տեղեկատվությունը և պնդեց, որ «Նորք» ինֆեկցիոն հիվանդանոցի տնօրեն Վլադիմիր Դավիդյանցը հայտնել էր՝ դեռ հունվարի վերջին և փետրվարի սկզբին հիվանդանոցում պայքարում էին կորոնավիրուսի դեմ:

Սայաթ Շիրինյանը պնդեց, որ իշխանությունները իրենց գործը հեշտացնելու համար ոտնահարում են քաղաքացիների իրավունքները՝ դրսում, կամ մեքենաների մեջ նույն ընտանիքի անդամներին ստիպելով դիմակներ կրել:

«Ոստիկանության հեղինակության համար ես շատ դեպքերում ամաչում եմ: Խայտառակություն է, երբ որ ոստիկանը, հաղթանդամ տղամարդը երիտասարդ աղջիկների, կանանց ձեռքերը ձեռնաշղթաներով բերում են ոստիկանության բաժանմունքներ»,- հայտարարեց գնդապետը։

Սայաթ Շիրինյանը կասկածի տակ դրեց և զավեշտալի համարեց Անվտանգության խորհրդի քարտուղար Արմեն Գրիգորյանի հայտարարությունը, ըստ որի, հուլիսյան իրադարձություններն անձամբ Նիկոլ Փաշինյանն է ղեկավարել:

Նրա խոսքով Հայաստանի իշխանությունները չեն մասնակցել նաև այլ երկրներում, մասնավորապես՝ ՌԴ-ում միջհամայնքային լարվածության թուլացմանը և միայն մեր հայրենակիցների հեղինակության և կապերի շնորհիվ հնարավոր է եղավ այն վերացնել:

Բանախոսը պնդեց, որ երբ հուլիսյան լարվածության պատճառով ՌԴ-ում անվտանգության խորհրդի նիստ էր գումարվել, Հայաստանից որևէ զանգ չի եղել, ինչից ենթադրեց, որ գործող իշխանությունների հարաբերությունները վերջինիս հետ լավ չեն՝ հակառակ իշխանությունների պնդումների:

Սայաթ Շիրինյանն անդրադարձավ նաև Ռոբերտ Քոչարյանի հարցազրույցին՝ այն անվանելով կառուցողական և լուրջ վերլուծությամբ հագեցած: Գնդապետի խոսքով, ՀՀ երկրորդ նախագահը լուծման ճանապարհ է ցույց տվել, որն ուղղված է խելացի, Հայաստանի ներկա իրավիճակով մտահոգված մարդկանց։

Նկատելով, որ Ռոբերտ Քոչարյանի ելույթին բովանդակային պատասխան տալու փոխարեն, հնչած արձագանքները տեղափոխվել են անձնական վիրավորանքի դաշտ՝ Շիրինյանը անհրաժեշտ համարեց նույն կերպ պատասխանել դրանց:

Մասնավորապես, պատասխանելով Արամ Զավենի Սարգսյանի այն հայտարարությանը, թե Ռոբերտ Քոչարյանը չի համբուրել իրեն մոտեցված խաչը՝ Սայաթ Շիրինյանը հռետորական հարցադրում ուղղեց. «Այն որ Ձեր ընտանիքում Տիգրան Նաղդալյանի սպանության պատվեր իջեցնելու հարցն էիք քննարկում, պատվեր իջեցնելուց առա՞ջ գնացիք խաչը համբուրելու, թե՞ Տիգրան Նաղդալյանին սպանելուց հետո»:

Ռոբերտ Քոչարյանի հարցազրույցին կոշտ անդրադարձած ԱԺ Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանի վերաբերյալ էլ հայտարարեց, որ աղետի գոտուն ուղարկված միջոցների թալանը նրան է վերագրվում, որին չի պատասխանում: