Ձեր վստահելի աղբյուրը

ՀՀ Վարչական դատարանում շարունակվում է  ՀՀ երկրորդ նախագահ Ռոբերտ Քոչարյանի «Կյանք և ազատություն» գրքի գովազդումը չթույլատրելու դեմ բողոքի վերաբերյալ դատական նիստը, որը նախագահում է դատավոր Արթուր Ծատուրյանը։

Նշենք, որ գրքի գովազդման թույլտվություն չստանալուց հետո «Կոնտրա լեգեմ» փաստաբանական բյուրո է դիմել «Սփեյս Մենեջմենթ» ՍՊԸ-ն, որը հանդիսանում է ՀՀ երկրորդ նախագահ Ռոբերտ Քոչարյանի ինքնակենսագրական «Կյանք և ազատություն» գրքի իրավատերը, և հայտնել է, որ Երևանի քաղաքապետարանը հրաժարվում է գովազդի թույլտվություն տրամադրել։ Փաստաբան Ալեքսանդր Կուչուբաևը նույնպես դիմել է դատարան, և մերժում ստանալուց հետո դիմել է Վարչական դատարան։

Ելնելով վերոգրյալից,  «Սփեյս Մենեջմենթ» ընկերությունը օրենսգրքի 68-րդ հոդվածի 2-րդ մասի դրույթի վկայակոչմամբ, ներկայացրել է նշված հայցադիմումը և խնդրել պարտավորեցնել պատասխանողներին 08.07.2019 թվականի դիմումի հիման վրա տրամադրել օրենքով նախատեսված գովազդի թույլտվությունը։

Նշենք, որ դատարանի որոշմամբ նախորդ դատական նիստին պատասխանող կողմ հանդիսացող Կենտրոն վարչական շրջանը փոխվել է և պատասխանող կողմ է դարձել Երևանի քաղաքապետարանը։

Հայցվոր կողմի ներկայացուցիչ Ալեքսանդր Կուչաբաևը տեղեկացրեց, որ իրենք նույն դիմումը ներկայացրել են երկու տարբեր վարչական շրջանների ղեկավարներին, և պատրաստ են այդ դիմումները ներկայացնել, եթե վարչական մարմնում դրանք առկա չեն։

Պատասխանող կողմի ներկայացուցիչ Արա Մարտիրոսյանն էլ նշեց, որ այդ դիմումներն առկա են վարչական մարմնում. «Ես ունեմ վարչական շրջանների աշխատակազմերի կողմից տրված երկու պատասխան։ Դրանց հետ կից ներկայացնում եմ նաև դիմումներն ու փաստաթղթերը, որոնց հիման վրա տրվել են պատասխանները»։

Դատավոր Արթուր Ծատուրյանն էլ նշեց, որ Արա Մարտիրոսյանի ներկայացրած փաստաթղթերից հստակ երևում է, թե ինչ է տրվել դիմումին կից. «Դատարանի բանավոր խնդրանքը բավարա՞ր է, որպեսզի դուք ներկայացնեք ամբողջական փաստաթղթերը»։

Պատասխանելով, Արա Մարտիրոսյանն ասաց. «Այո, ես կներկայացնեմ ամբողջական փաստաթղթերը, որոնք կից ներկայացված են եղել դիմումին»։

Հայցվոր կողմի ներկայացուցիչ Ալեքսանդր Կուչուբաևն էլ ասաց, որ ինքը ևս կներկայացնի այդ փաստաթղթերը։

Դատավոր Արթուր Ծատուրյանը հետաքրքրվեց նաև, թե որքան ժամանակ կպահանջվի, որ պատասխանող կողմը դիմումին կից փաստաթղթերը ներկայացնի վարչական դատարան, որին ի պատասխան՝ Արա Մարտիրոսյանը նշեց՝  երկշաբաթյա ժամկետում փաստաթղթերը կներկայացվեն։

Հայցվոր կողմի ներկայացուցիչ Ալեքսանդր Կուչուբաևն էլ ասաց, որ պատասխանող կողմը հայցադիմումի պատասխան չի ներկայացրել, իսկ հայցի դեմ առարկելու դատավարական միակ ձևը հայցի պատասխանն է։

«Պատասխանողը կարող էր այս առարկությունը բացման խոսքի շրջանակում ներկայացնել, կամ գուցե եզրափակիչ ելույթի ժամանակ, բայց այս առումով ներկայացված առարկությունները դատավարական որևէ նշանակություն չունեն, և դրանք կարելի է դիտարկել որպես դիմում՝ ինչ-որ փաստաթղթեր ներկայացնելու վերաբերյալ։ Կարծում եմ՝ գործը նախապատրաստված է դատաքննության, և կարող ենք շարունակել»,- նշեց նա։

Պատասխանող կողմի ներկայացուցիչն էլ ասաց, որ իրենց դիրքորոշումն է ներկայացված առարկությունների շրջանակում. «Մենք մեր դիրքորոշումն արտահայտել ենք այդ տեսքով»։

Դատավոր Արթուր Ծատուրյանն էլ կողմերին հայտնեց, որ դատարանը մտադրություն ունի դատաքննություն նշանակել 2020 թվականի նոյեմբերի 24-ին, ժամը 11.00-ին։

Կողմերից որևէ մեկն այս առնչությամբ առարկություն չուներ։