ԱՕԿ. Անհրաժեշտ ենք համարում վերագործարկել օդային հաղորդակցությունը Հայաստանի ու Լիբանանի միջև
«Ազգային Օրակարգ» կուսակցության խորհուրդը տարածել է հայտարարություն Բեյրութում տեղի ունեցած պայթյունից հետո Հայաստանի հանրապետության կողմից Լիբանանին, մասնավորաբար, լիաբանանահայությանը ցույց տրվելիք աջակցության մասին։
Հայտարարության մեջ ասված է.
«Օգոստոսի 4-ին Բեյրութի նավահանգստում տեղի ունեցած հզոր պայթյունը հսկայական ավերածություների, մեծաթիվ մարդկային զոհերի և հազարավոր վիրավորների պատճառ է դարձել Լիբանանի մայրաքաղաքում։ Իր չափերով, այն լայնամասշտաբ բնական աղետի ազդեցություն է թողել ողջ քաղաքի, և մասնավորապես նաև նրա հայաբնակ թաղամասերի վրա։ «Ազգային օրակարգ» կուսակցության Խորհուրդը իր խորին ցավակցությունն է հայտնում բարեկամական Լիբանանի ժողովրդին, համբերություն ու տոկունություն ցանկանում այս աննախադեպ դժբախտության պահին։
Ի հավելումն, կոչ ենք անում Հայաստանի հանրապետության կառավարությանը, Լիբանանի համար այս դժվարին պահին, առանց հապաղման անմիջական աջակցություն ցույց տալ բարեկամական պետությանը, ելնելով առկա իրական կարիքներից։ Մասնավորապես, հրատապ կարգով անհրաժեշտ ենք համարում Բեյրութ գործուղել ԱԻՆ փրկարար ուժեր՝ աջակցելու փլատակների տակ մնացած բնակիչների դուրսբերմանը, ինչպես նաև բժիշկներ և վիրաբույժներ՝ անմիջական օգնություն ցույց տալու բազմաթիվ վիրավորներին։
Հաշվի առմելով ստվարաթիվ հայ համայնքի առկայությունը Բեյրութում, անհրաժեշտ ենք համարում նաև վերագործարկել օդային հաղորդակցությունը մեր երկրների միջև, որպեսզի մեր հայրենակիցները կարողանան Հայաստան տեղափոխել ապաստանի և բուժման կարիք ունեցողներին։ Նաև, անհրաժեշտ է դյուրացնել կացության կարգավիճակ ստանալու ընթացակարգերը Լիբանանում բնակվող մեր այն հայրենակիցների համար, ովքեր ցանկություն ունեն տեղափոխվել Հայաստան բնակության, ինչպես նաև կազմակերպել նրանց համար առաջին օժանդակության փաթեթ՝ տեղափոխվելուց հետո։
Համոզված ենք, որ այսօր իրական նեցուկ կանգնելով Լիբանանին և այնտեղ բնակվող մեր հայրենակիցներին, մենք ոչ միայն կատարում ենք մեր բարոյական պարտքը, այլև նպաստում ենք ողջ տարածաշրջանի և մեր սեփական երկրի անվտանգությանը։
Երկարաժամկետ հեռանկարում, նաև նպատակահարմար ենք գտնում Հայաստանի պետական համակարգում ստեղծելու համապատասխան կարողություններ, որոնք ըստ անհրաժեշտության ընդունակ են օպերատիվ մոբիլիզացնել ողջ հայության ներուժը, և համարժեք արձագանքել արտերկրում մեր հայրենակիցներին սպառնացող տարատեսակ վտագներին։ Մեր կողմից, պատրաստ ենք համակողմանիորեն աջակցել պետական մարմիններին՝ անհրաժեշտ ծավալով իրականացնելու վերը նշված գործողությունները»։
Հարակից հրապարակումներ`
- ԱԺ շենքը, քաղաքապետարանը լուսավորվել են Լիբանանի դրոշի գույներով
- Լիբանանի հայ պատգամավոր․ Լիբանանի հայությունը պիտի մնա, պիտի ապրի այստեղ՝ Հայաստանի, Արցախի համար
- ՀՅԴ Բյուրոն կոչ է անում այս պահին ամուր կանգնելու լիբանանահայության կողքին
- Ծառուկյանը 100 միլիոն դրամ է հատկացրել Բեյրութում զոհված հայերի ընտանիքներին և Կաթողիկոսարանին
- Սամվել Կարապետյանը կաջակցի բեյրութահայերին ու կօգնի վերականգնել պայթյունի հետևանքով վնասված եկեղեցին
- Օգնություն Լիբանանին
Լրահոս
Տեսանյութեր
Դուք մասնակից եք դարձել պետականության կործանմանը. Բագրատ Սրբազանը՝ ՔՊ-ականներին
