Ձեր վստահելի աղբյուրը

ՀՀ երկրորդ նախագահ Ռոբերտ Քոչարյանի փաստաբան Արամ Վարդևանյանին բարկացրել են գործով մեղադրող դատախազի հայտարարություններն ու որակումները՝ Խաչատուրովի պաշտպան Միհրան Պողոսյանի՝ դատական նիստին չներկայանալու  վերաբերյալ։

«Ինչպե՞ս կարելի է նման կատեգորիկ գնահատականներ տալ, եբ փաստաբանը դիմումում նշել է, որ անսպասելի մի բան է տեղի ունեցել։ Հազար ու մի բան կարող է լինել։ Աստված մի արասցե, եթե վատ բանի մասին ենք խոսում։ Ինչպե՞ս կարելի է  դեմքի նման արտահայտությամբ նման հայտարարություններ անել, իսկ եթե պարզվի, իսկապես խնդիր կա։ Չի կարելի, որոշ գծեր կան, որ չի կարելի տրորել»,-դատական նիստի ավարտից հետո լրագրողների հետ ճեպազրույցում հայտարարեց Վարդևանյանը։

Անդրադառնալով հարցին, թե  դատական  նիստերի ձգձգումը հանրության մոտ զայրույթ է առաջացնում, փաստաբանն ասաց՝ ինքը նման բան չի տեսել։

«Ես տեսնում եմ այն, որ դատական պրոցեսի այսպես ասած ձգձգման մեղավորը դատախազությունն ու ՀՔԾ-ն են մի պարզ պատճառով՝ 80 հատոր գործ են ուղարկլե դատարան։ Իսկ այս ընթացքում այն դարձել է 100-ից ավելի հատոր»,-նշեց փաստաբանը։

Նա վկայակոչեց նաև դատական նիստերի ձգձգման պատկերը, հիշեցրեց, որ այս տարվա մարտ-ապրիլ ամիսներին որևէ տեղեկություն չունեին դատավոր Դանիբեկյանի մասին։

«Հիմա այս պայմաններում  ինչո՞ւ են փորձում շահարկել «ձգձգում» բառը։  Կայծակնային որոշումներ չեն կարող լինել։ Եթե խոսքը վերաբերում է մեծ քրեական գործի մասին, ապա այն երկար է տևելու։ Այլ տարբերակ չկա։ Վերցրեք կամայական գործ ու նայեք, թե ինչքան է տևել քննությունը»,-ասաց Վարդևանյանը։

Նա նկատեց, այս պարագայում ունեն մի գործ, երբ հենց սկզբից խախտվում են իրավունքները՝ սկսած անձեռնմխելիությունից մինչև գույքային, իսկ դրանցից  յուրաքանչյուրը դառնում է քննարկման առարկա։