Ձեր վստահելի աղբյուրը

Կառավարությունը ևս մեկ ամսով երկարաձգեց Հայաստանում մարտ ամսից հայտարարված արտակարգ դրության ռեժիմը։

ՀՀ արդարադատության նախարար Ռուստամ Բադասյանը նշեց, որ թեև Հայաստանում նկատվում է կորոնավիրուսային հիվանդության նոր դեպքերի թվի նվազում, այնուամենայնիվ, շարունակում է բարձր մնալ հիվանդության հետևանքով արձանագրվող մահերի թիվը։

«2020 թվականի օգոստոսի 11-ի դրությամբ հաստատվել է հիվանդության 40,593 դեպք, որից 803-ը՝ մահվան ելքով։ Եվ արտակարգ դրությամբ նախատեսված միջոցառումները դեռևս կարող են էական ազդեցություն ունենալ դեպքերի թվի աճի տեմպերի նվազման վրա։ Հաշվի առնելով, որ չեն վերացել այն հանգամանքները, որոնք հիմք են հանդիսացել արտակարգ դրություն հայտարարելու համար՝ առաջարկում ենք 2020 թվականի մարտի 16-ին հայտարարված արտակարգ դրության ժամկետը 2020 թվականի օգոստոսի 12-ից երկարաձգել 30 օրով։ Սա արտակարգ դրության ժամկետի 5-րդ հետաձգումն է»,- ներկայացրեց Ռուստամ Բադասյանը։

ՀՀ վարչապետ Նիկոլ Փաշինյանն էլ ասաց, որ ՀՀ-ում կարող են տեղի ունենալ ցույցեր, երթեր, հանրահավաքներ, պայմանով, որ մասնակիցները կլինեն դիմակով, և կպահպանեն սոցիալական հեռավորություն։

Նրա խոսքով, սահմանափակումը հանելը պայմանավորված է հանրապետությունում հակահամաճարակային վիճակի հետ։ Բայց, ըստ վարչապետի, Աստված ոչ անի, եթե սահմանափակումների թուլացումը բերի հիվանդության դեպքերի աճի, ապա Կառավարությունը ստիպված կլինի նորից սահմանափակումներ մտցնել։

«Եկեք սա արձանագրենք, մենք սահմանափակումը հանում ենք՝ ելնելով հակահամաճարակային իրավիճակի վերլուծությունից։ Հիմա անկում է գնում, և այդ պայմաններում հնարավոր է դարձել սահմանափակումների թուլացումը, կամ որոշ հատվածներում նաև վերացումը։ Մենք ասում ենք, որ վերջին անգամ ենք արտակարգ դրությունը երկարացնում, բայց դա այն դեպքում, եթե դեպքերի նվազման այս միտումը շարունակվի, և ենթադրենք հուլիսի առաջին տասնօրյակի իրավիճակը չլինի։ Բայց եթե դեպքերի թիվն աճի, չի բացառվում, որ մենք ստիպված կլինենք նորից արտակարգ դրություն մտցնել»,- ներկայացրեց վարչապետը։

Նշենք նաև, որ այսօր ժամը 17.00-ից թույլատրվում է մինչև 40 հոգուց բաղկացած ընտանեկան միջոցառումներ կազմակերպել։ Հանվում է նաև ՀՀ քաղաքացիություն չունեցող անձանց՝ երկիր մուտք գործելու արգելքը, պայմանով, որ նրանք 14 օր կինքնամեկուսանան։