Ձեր վստահելի աղբյուրը

Բելառուսում ՏՏ ընկերությունների հիմնադիրները, գործադիրները և աշխատողները բաց նամակ են գրել՝ նախազգուշացնելով արդյունաբերության ոչնչացման մասին, եթե բռնությունները շարունակվեն, փոխանցում է «Գազետա.ռու»-ն։

Ինչպես նշվում է նամակում, երկրում այնպիսի պայմաններ են, որոնց դեպքում տեխնոլոգիական բիզնեսը չի կարող գործել:

«Հազարավոր մարդիկ ձերբակալվել և դատապարտվել են: Խաղաղ բողոքները ցրվում են ուժի ոչ պատշաճ կիրառմամբ: Սովորական անձինք առանց պատճառի կալանավորված են, ծեծի են ենթարկվում և ձերբակալվում: Մի քանի օր է, ինչ ամբողջ երկիրը սահմանափակ մուտք ունի ինտերնետ»,- ասվում է նամակում:

Նշվում է նաև, որ մոտ ժամանակներս ՏՏ ոլորտի մասնագետների արտահոսք կլինի դեպի արտերկիր, Ըստ ՏՏ մասնագետների, այս ոլորտում երկրի բոլոր ձեռքբերումները կարող են կարճ ժամանակահատվածում անհետանալ։

Այնուամենայնիվ, նրանք նշում են, որ գործընթացը դեռևս շրջելի է: Այդ նպատակով իշխանությունները պետք է դադարեցնեն բռնությունները քաղաքացիական անձանց դեմ, անցկացնեն նոր թափանցիկ նախագահական ընտրություններ և բելառուսների համար հասանելի դարձնեն տեղեկատվական դաշտը։

Նախագահական ընտրությունները Բելառուսում անցկացվել են օգոստոսի 9-ին: Հանրապետության մի շարք քաղաքներում ընտրատեղամասերի փակվելուց հետո սկսվել են բողոքի ակցիաներ՝ ընդդեմ ընտրակեղծիքների։ Քաղաքացիների անցկացրած ակցիաներն ուղեկցվում են բռնություններով և ձերբակալություններով։