Ձեր վստահելի աղբյուրը

Բելառուսում անցկացվող բողոքի ակցիաների ընթացքում ձերբակալվել են մոտ տասը լրագրողներ, հաղորդում է «Գազետա.ռու»-ն՝ վկայակոչելով Բելառուսի ժուռնալիստների ասոցիացիայի (BAJ) ղեկավարի տեղակալ Բորիս Գորեցկիի խոսքը:

«Ինչպես նախկինում, 10 լրագրող շարունակում են կալանավորված մնալ երկրի տարբեր շրջաններում»,- ասել է նա՝ Տեղեկատվության նախարարության ղեկավարության և Բելառուսի ՆԳՆ ներկայացուցչի հետ հանդիպմանը:

Ասոցիացիայի ներկայացուցիչը նշել է, որ ձերբակալված լրագրողների ցուցակը հրապարակվել է «БАЖ» կայքում, որը ինչ-ինչ պատճառներով արգելափակվել է :

Ավելի վաղ հաղորդվել էր, որ Մինսկում սկսել են կալանավայրից ազատել այն մարդկանց, որոնք կալանավորվել էին ցույցերի ժամանակ: Նշվում էր, որ ոստիկանությունը սկսել է ազատել նաև ձերբակալված լրագրողներին:

Օգոստոսի 9-ին Բելառուսում անցկացվել են նախագահական ընտրություններ. Հանրապետությունում ընտրատեղամասերի փակվելուց հետո սկսվեցին չարտոնված բողոքի ակցիաներ՝ արդյունքների կեղծման դեմ: Բողոքի ցույցերի ընթացքում ոստիկանությունը և ներքին զորքերը ցուցարարների դեմ օգտագործում են արցունքաբեր գազ, ֆլեշ նռնակներ և ռետինե փամփուշտներ:

Բողոքի ցույցերի երեք օրվա ընթացքում, ըստ իրավապաշտպանների, կատարվել են ավելի քան 1500 կամայական ձերբակալություններ, ավելի քան 600 մարդ տուգանվել է, բացվել են մի շարք քրեական գործեր: