Ձեր վստահելի աղբյուրը

ԱԺ «Իմ քայլը» խմբակցությունը խորհրդարանում փակ հանդիպում է անցկացրել ՍԴ դատավորի թեկնածու Երվանդ Խունդկարյանի հետ։

Հանդիպում-քննարկումից հետո իշխանական խմբակցության ղեկավար Լիլիթ Մակունցը լրագրողների հետ զրույցում ասաց, որ «Իմ քայլ»-ը ՍԴ դատավորի բոլոր թեկնածուների հետ նախապես հանդիպում է։

«Խմբակցության ոչ բոլոր անդամներն են ներկա եղել հանդիպմանը։ Ներկա էր պատգամավորների գրեթե կեսը. ներկաները հնչեցրել են իրենց և հանրությանը հուզող հարցեր։ Այդքանը կարող եմ ասել։ Մնացյալը հարցերի հետ կապված խմբակցությունը մեկնաբանություն չունի»,- նշեց Մակունցը։

Հարցին, թե երեկ ՍԴ դատավորի թեկնածությունից հրաժարված Վահրամ Ավետիսյանի փոխարեն նոր թեկնածու ունի՞ իշխանությունը, Լիլիթ Մակունցը պատասխանեց՝ պատգամավորների հետ ունեցած հանդիպումից հետո պարոն Ավետիսյանի մոտ եղել է տպավորություն, որ ինքը  80 ձայն չի ստանա.

«Մենք պարոն Ավետիսյանի հետ հանդիպմանը հնչեցրել ենք տարբեր՝ այդ թվում նաև սուր հարցեր։ Նորից եմ ուզում կրկնել, որ մենք բոլոր թեկնածուների հետ հանդիպում և հարցեր ենք հնչեցնում»։

Ինչ վերաբերում է  հարցին, թե Վահրամ Ավետիսյանի փոխարեն ո՞ւմ կառաջադրի Կառավարությունը՝ որպես ՍԴ անդամի թեկնածու, ապա Լիլիթ Մակունցն ասաց, որ իշխանական խմբակցությունը դեռ չգիտի՝ կա՞ այդպիսի թեկնածու, թե՞՝ ոչ.

«Կարծում եմ՝ երբ Կառավարությունն ունենա նոր թեկնածու, բոլորս կիմանանք»։

Դիտարկմանը, որ ինչպես Վահրամ Ավետիսյանի, այնպես էլ Երվանդ Խունդկարյանի պարագայում կան նույն քննադատությունները, որ նա ծառայել է նաև նախկին իշխանությունների օրոք, Լիլիթ Մակունցն արձագանքեց՝ պետք է արձանագրել՝ պարոն Ավետիսյանն ինքն է որոշել, որ ԱԺ-ն չպետք է դիտարկի իր թեկնածությունը։

«Այստեղ մենք անելիք չունենք։ Թեկնածուն կայացրել է իր որոշումը, և մենք հարգում ենք այն՝ մաղթելով նրան հաջողություններ մասնագիտական գործունեությունում։ Ինչ վերաբերում է պարոն Խունդկարյանին առաջադրվող հարցերին, ապա դրանք որոշ չափով տարբերվում էին պարոն Ավետիսյանին ուղղված հարցերից։ Պատգամավորներն իրենց հուզող բոլոր հարցերն՝ առանց սահմանափակումների, հնչեցրել են »,- շեշտեց «Իմ քայլը» խմբակցության ղեկավարին։

Հարցին՝ արդյո՞ք հավակնություններ կան Երվանդ Խունդկարյանի՝ ՍԴ նախագահ դառնալու հետ կապված, Լիլիթ Մակունցը պատասխանեց՝ այդ առնչությամբ իրենք որևէ բան այս պահին ասել չեն կարող.

«Թեկնածուն կգա ԱԺ, լիագումար նիստերի դահլիճում նույնպես հարցեր կհնչեցնենք, և պատգամավորներն  իրենց փակ քվեարկությամբ կորոշեն իրենց անելիքը»։

Դիտարկմանը, որ խորհրդարանական և արտախորհրդարանական ընդդիմությունը շարունակում է պնդել, որ ՍԴ շուրջ ծավալվող գործողությունները լեգիտիմ չեն, Լիլիթ Մակունցը արձագանքեց, որ իրենք հավատարիմ են մնում անկախ և անկաշկանդ դատական համակարգ ունենալու սկզբունքին։

«Եվ ՍԴ-ի հետ կապված ամբողջ գործողությունների ընթացքում հայտնել ենք, թե ինչպիսի մոտեցում ունենք մենք ապագա ՍԴ դատավորների հետ կապված։ Իսկ արտախորհրդարանական քաղաքական ուժերի և առանձին անձանց մեկնաբանություններին թույլ տվեք չանդրադառնալ»,- ասաց իշխանական խմբակցության ղեկավարը։