Դպրոցներն ու ծնողները անորոշության մեջ են, չգիտեն՝ ինչպե՞ս և ի՞նչ ցուցումներով պետք է սկսվի դասապրոցեսը
Սեպտեմբերի 15-ին կմեկնարկի նոր ուսումնական տարին, բայց ուսուցիչները դեռևս տեղյակ չեն՝ ինչպես են անցկացվելու դասերը, բոլո՞ր աշակերտներն են հաճախելու դպրոց, թե՞ նրանց մի մասը շարունակելու է հեռավար ուսուցմամբ սովորել։
«Շատ բարդ իրավիճակ է։ Մենք դեռ մարզպետարանից ցուցում չենք ստացել, բայց որքան ուսումնասիրում և հետևում ենք առկա պահանջներին, ապա նախատեսված է, որ ամեն դասասենյակում պետք է 10 աշակերտ լինի։ Դա բարդագույն խնդիր է լինելու մեզ համար, քանի որ մենք ունենք բազմաթիվ դասարաններ, որտեղ սովորում է 35 աշակերտ։ Այդ դեպքում առնվազն եռահերթ պետք է լինեն դասերը, որպեսզի կարողանանք աշակերտներին տեղավորել»,- Panorama.am-ի հետ զրույցում ասաց Գեղարքունիքի մարզի Մարտունի քաղաքի Սարիբեկ Դարբինյանի անվան թիվ 2 հիմնական դպրոցի տնօրեն Խանում Ղազարյանը։
Դպրոցի տնօրենը նշում է, որ իրենք այդքան ռեսուրս չունեն, որ կարողանան եռահերթ դասեր անցկացնել. «Ոչ այնքան դասասենյակ ունենք, որ մի հերթով դասերն անցկացնենք, ոչ էլ այնքան ուսուցիչ, որ կարողանանք եռահերթ կարգով դասեր անցկացնել»։
Խանում Ղազարյանի խոսքով, իրենք սպասում են, որ ցուցումները հստակեցվեն, որպեսզի հասկանան՝ ինչպես պետք է դասապրոցեսը կազմակերպել։
«Մենք պատրաստ ենք դպրոցում դասերն անցկացնելուն. ախտահանիչներն ունենք, հիմա չգիտենք՝ ձեռնոցները դպրո՞ցն է տրամադրելու, թե աշակերտներն են բերելու իրենց տներից։ Շատ հարցերի պատասխան դեռևս չունենք։ Ինչ վերաբերում է ուսուցչական կազմին, ապա նրանք նոր էլեկտրոնային գրանցումներին, էլեկտրոնային մատյաններով գնահատելուն և հեռավար դասեր անցկացնելուն ևս պատրաստ են. այդ խնդիրը չունենք։ Ուսուցման երկու տարբերակին էլ մենք պատրաստ ենք»,- վստահեցրեց դպրոցի տնօրենը։
Հիմա մեծ խնդրի առաջ են կանգնած 1000 և ավելի աշակերտներ ունեցող դպրոցները։
«Մենք ունենք 1000-ից ավելի աշակերտներ և 35 դասասենյակ։ Այսինքն՝ շենքային պայմաններն այնքան մեծ հնարավորություն չեն տալիս, որ մենք գնանք ճոխության։ Առնվազն պետք է երկհերթ կամ եռահերթ դառնանք։ Մեծ դպրոցների պարագայում, կարծում եմ, պետք է որոշակի տարբերվող ցուցումներ լինեն»,- ասաց Խանում Ղազարյանն, ապա հավելեց, որ ամբողջությամբ հեռավար դասեր անցկացնելուն ևս դպրոցը պատրաստ չէ.
«Մենք ունենք ինտերնետ կապ և 20 համակարգիչ։ Բայց եթե, օրինակ, ուսուցիչները դպրոցից հեռավար դասեր անցկացնեն, բնականաբար ամեն օր մենք պետք է ունենանք 35 նորմալ աշխատող համակարգիչ, որ ուսուցիչները կարողանան դասապրոցեսն անցկացնել։ Բայց այդքան համակարգիչ չունենք, ունեցած 20 համակարգչից մի քանիսն էլ վարչական աշխատողների աշխատանքների համար են։ Այնպես որ այս պարագայում մենք խնդիր կունենանք։ Բայց ունենք ֆինանսական միջոցներ, կարող է ընթացքում որևէ բան փոփոխենք ու կազմակերպենք»։
Նա տեղեկացրեց, որ այս պահին դպրոց հաճախելու համար հայտագրված է 114 առաջին դասարանցի.
«Չորս դասարան է ձևավորվելու։ Բայց առաջին դասարանի աշակերտին մենք ո՞նց բացատրենք, որ ինքը պետք է հեռավար և առանց ուսուցչի սովորի։ 5.5- 6 տարեկան երեխայի համար շատ բարդ կլինի, որ ինքը չունենա բացատրող ուսուցիչ։ Կարծում եմ, որ առաջին դասարանցիների դեպքում ամենաարդյունավետը կլինի առկա ուսուցումը»։
Իսկ թե ո՞րն է դասապրոցեսը կազմակերպելու լավագույն տարբերակը, դպրոցի տնօրենն ասաց՝ ավելի հարմար կլիներ անցնել վեցօրյա ռեժիմի, որ երեք օր երեխաների մի խումբը հաճախեր դպրոց, երեք օր՝ մյուսը։
Իսկ ահա Գեղարքունիքի մարզի Սևան քաղաքի թիվ 5 միջնակարգ դպրոցում այսպես թե այնպես յուրաքանչյուր դասասենյակում մինչև 10 աշակերտ է սովորում։
Դպրոցի տնօրեն Նարինե Սահակյանը Panorama.am-ի հետ զրույցում ասաց, որ դպրոցի աշակերտների թիվը փոքր է՝ 83, յուրաքանչյուր դասարանում 5-8 աշակերտ է սովորում.
«Նրանք իրենց առանձին սեղաններն ունեն, իրարից հեռու նստում են։ Այդ առումով որևէ խնդիր չունենք»։
Հարցին, թե արդյո՞ք դպրոցը պատրաստ է աշակերտներին ընդունելու՝ պահպանելով հակահամաճարակային կանոնները, Նարինե Սահակյանը պատասխանեց՝ դեռ ոչինչ հստակ չէ։
«Մենք դեռ չգիտենք, թե ինչ ցուցումներ կլինեն, ինչ պահանջներ կներկայացնեն։ Բայց ընդհանուր առմամբ, ախտահանող նյութեր ունենք։ Իսկ թե ով պետք է դիմակներով ու ձեռնոցներով ապահովի աշակերտներին, չգիտենք։ Սպասում ենք մարզպետարանի ցուցումներին»,- նշեց դպրոցի տնօրենը։
Դպրոցի տնօրենը նշեց, որ հեռավար տարբերակով դասապրոցեսը կազմակերպելուն ևս ուսուցիչները պատրաստ են։
«Կան ընտանիքներ, որ երկու երեխա է դպրոցում սովորում, բայց մեկ համակարգիչէ առկա, այդ դեպքում էլ փորձում ենք դասապրոցեսը տարբեր ժամերի կազմակերպել։ Օրինակ, դեպքեր ունենք, երբ երեխաներից մեկը տարրական դասարանում է սովորում, մյուսը՝ միջին դասարանում։ Այդ դեպքում տարրական դասարանի դասերը սկսում ենք կեսօրին»,- ներկայացրեց Նարինե Սահակյանը։
Նա նաև տեղեկացրեց, որ դպրոցն այս տարի կարող է առաջին դասարանցի չունենալ, քանի որ ընդամենը երկու երեխա է հայտագրվել. «Ծնողները որոշել են իրենց երեխաներին ավելի մեծ դպրոցներ տանել, որպեսի 35 հոգանոց դասարաններում սովորեն։ Կարծում են, որ այդ պարագայում մրցակցությունը ավելի մեծ կլինի, երեխան էլ ավելի շատ բան կսովորի»։
Թե երբ դպրոցների տնօրենները կստանան դասապրոցեսն անցկացնելու համար նախատեսված ցուցուները, Գեղարքունիքի մարզպետարանի Կրթության, մշակույթի և սպորտի վարչության պետ Կարեն Զազյանը հստակ չնշեց։ Panorama.am-ի հետ զրույցում նա ասաց, որ իրենք էլ սպասում են ԿԳՄՍ նախարարության ցուցումներին.
«Պետք է մենք նախարարությունից ստանանք ցուցումներ, որպեսզի մարզպետարանի ենթակայության տակ գտնվող դպրոցների տնօրեններին տեղեկացնենք, թե ինչպես պետք է կազմակերպվի դասապրոցեսը»։
Սեպտեմբերը արագորեն մոտենում է, բայց նախարարությունից ձայն-ձուն չկա. Երևի հույսները ուսուցիչներն ու դպրոցների տնօրեններն են, որ ստիպված մի բան կանեն՝ սրտացավ են։
Լրահոս
Տեսանյութեր
Խայտառակություն Թումանյան փողոցում. Չախոյան
