Ձեր վստահելի աղբյուրը

Ֆեյսբուքյան իր էջում «Հայրենիք» կուսակցության խորհրդի անդամ, իրավապաշտպան Արսեն Բաբայանը պատասխանել է ԱՀ նախագահի խոսնակ Վահրամ Պողոսյանի գրառմանը, որը վերաբերում է  «Հայրենիք» կուսակցության նախագահ Արթուր Վանեցյանի գլխավորած պատվիրակության Արցախ այցին։

«Նախ՝ ուզում եմ հույս հայտնել, որ Արցախի նախագահի խոսնակի գրառումը՝ կապված «Հայրենիք» կուսակցության նախագահ Արթուր Վանեցյանին իբր չընդունելու հետ, համաձայնեցված չի եղել նախագահ Հարությունյանի հետ։ Իսկ թե ինչու եմ այդպիսի հույս հայտնում, կներկայացնեմ ստորև։
ԱՀ նախագահի մամուլի խոսնակը, ի պատասխան 168.am լրատվական կայքի, հայտնում է․

«Պարոն Վանեցյանի նկատմամբ պարոն նախագահն ունի շատ դրական վերաբերմունք, այս առումով որևէ խնդիր չկա: Բացի դրանից, պարոն Վանեցյանի ղեկավարած պատվիրակությանն արդեն հանդիպել է Խորհրդարանի նախագահը, Անվտանգության խորհրդի քարտուղարն է ընդունել, այնպես որ, այստեղ  քաղաքական որևէ ենթատեքստ փնտրել ես ուղղակի անիմաստ եմ համարում»:

Այնուհետև, հավանաբար, Երևանից զանգ ստանալուց հետո իր ֆեյսբուքյան գրառմամբ նույն թեմայով նշում է՝ «Մեկ կարևոր հավելում ևս: Արցախի Հանրապետության նախագահի հետ պաշտոնական հանդիպում չի կայացել, քանի որ, բացի ծանրաբեռնված օրակարգից, Նախագահ Հարությունյանի համար ընդունելի չեն պաշտոնական հանդիպումներն այն քաղաքական ուժերի հետ, որոնք կասկածի տակ են դնում Նիկոլ Փաշինյանի գլխավորությամբ ՀՀ իշխանությունների վարած քաղաքականությունը: Եվ սա ամենևին անձնական բնույթի հարց չէ»։

Անհրաժեշտ եմ համարում խոսնակին խորհուրդ տալ չպատասխանել Երևանից հնչող «ղեկավար» զանգերին, քանի որ բոլորին է արդեն հայտնի ՀՀ իշխանությունների գործունեության վտանգավարությունը, և հենց այդ վտանգավոր գործունեության շրջանակում հնչող հանձնարարությունների կատարումը ծանր դրության մեջ են դնում նախ իրեն՝ խոսնակին, հետո՝ ԱՀ նախագահին։

Ինչ վերաբերում է բուն նյութին, ապա հարկ եմ համարում ընդգծել.
Թեպետ Արցախի նախագահի ներկայացուցիչը անհեռատես ու վտանգավոր հայտարարություններ է անում, այդուհանդերձ մենք չենք տրվի սադրանքի և համբերատար կսպասենք որոշ պաշտոնյաների կամակատար կեցվածքի թոթափմանը։

Մենք Արցախ էինք այցելել աշխատանքային այցով և խորհրդարանական ուժերի հետ քննարկել ենք Արցախի հիմնահարցը և Արցախին օգտակար լինելու մեր ցանկություններն ու հնարավորությունները։ Ցավալի է ԱՀ պաշտոնական աղբյուրից լսել տեսակետ, որ ՀՀ ներքաղաքական որևէ պատճառաբանությամբ կարող են Հայաստանի Հանրապետության կամ սփյուռքի որևէ ներկայացուցչի առջև դռները փակելու մասին մտածել։

Հայաստանի Հանրապետությունում չկա որևէ քաղաքական ուժ, որ Արցախի հարցում տարբերվող մոտեցումներ ունենա։ Ցավալի է, որ Արցախի նախագահի խոսնակը, ով հանդես է գալիս Արցախի նախագահի անունից, փորձում է հայության մեջ բաժանումներ մտցնել։
Եթե ԱՀ նախագահի ներկայացուցիչը պնդում է, որ իրենց համար ընդունելի չեն այն քաղաքական ուժերը, որոնք կասկածի տակ են դնում Նիկոլ Փաշինյանի գլխավորությամբ ՀՀ իշխանությունների վարած քաղաքականությունը, ապա պետք է խոսնակին հիշեցնեմ, որ ՀՀ քաղաքական ուժերի և գործիչների, ինչպես նաև ժողովրդի ծանրակշիռ մեծամասնությունը չի ընդունում, ավելին՝ ծայրաստիճան կոշտ քննադատության է ենթարկում փաշինյանական իշխանության ազգադավ քաղաքականությունը։ Հետևաբար ստացվում է, որ ԱՀ նախագահը հրաժարվում է հայության մեծամասնության աջակցությունից։

Այսպիսով, հորդորում եմ նախագահ Հարությունյանի ներկայացուցչին չանել անհեռատես հայտարարություններ»,- գրել է Բաբայանը։

Հիշեցնենք, որ ավելի վաղ ԱՀ նախագահի մամուլի  խոսնակ Վահրամ Պողոսյանը ֆեյսբուքյան իր էջում գրառում էր կատարել նշելով․

««Հայրենիք» կուսակցության նախագահ Արթուր Վանեցյանի գլխավորած պատվիրակության Արցախ այցն ու կայացած հանդիպումները որոշ լրատվամիջոցներ փորձում են բուռն քննարկման թեմա դարձնել, ինտրիգներ փնտրել կամ դատարկ բաժակում փոթորիկ բարձրացնել:

Ի պատասխան զլմ-ներում հրապարակումների և այդ առթիվ ստացվող բազմաթիվ հեռախոսազանգերի ու ֆեյսբուքյան նամակների՝ ընդգծում եմ, որ ՀՀ քաղաքական բոլոր ուժերի ներկայացուցիչները մեր քույրերն ու եղբայրներն են ու նրանցից յուրաքանչյուրը հավասարապես իրավունք ունի այցելելու մեր հայրենիքի արցախյան հատված, հանդիպելու իր հայրենակիցներին:

Ինչ վերաբերում է պարոն Վանեցյանի՝ Արցախի իշխանությունների ներկայացուցիչների, մասնավորապես՝ ԱԺ նախագահի և ԱԽ քարտուղարի հետ ունեցած հանդիպումներին, բացարձակ անընդունելի են ՀՀ ներքաղաքական համատեքստում դրանք մեկնաբանելու փորձերը: Պետք չէ մոռանալ, որ «Ազատ հայրենիք - ՔՄԴ» կուսակցությունների դաշինքը և «Միասնական հայրենիք » կուսակցությունը Արցախում կայացած վերջին խորհրդարանական ընտրությունների ժամանակ միասին ստացել են ժողովրդի բացարձակ մեծամասնության քվեն և երկու քաղաքական ուժերն էլ հայտարարել են ՀՀ իշխանությունների վարած քաղաքական կուրսին աջակցելու մասին: Իսկ Արցախը պետք է վեր կանգնած լինի ՀՀ ներքաղաքական գործընթացներից, և ոչ ոք իրավունք չունի Արցախը ներքաշել այդ վտանգավոր հորձանուտի մեջ»: