Ստացվում է, որ մենք կերակրում ենք Թուրքիայում աշխատող բանվորներին. Արմեն Պողոսյան
Մեր գնահատականներով՝ նախորդ տարվա համեմատ, մրգի շուկայում ապրանքի գները բարձրացել են 5-10%-ով։ Այս մասին այսօր լրագրողների հետ զրույցում ասաց Սպառողների ասոցիացիայի նախագահ Արմեն Պողոսյանը։
Նա նշեց, որ մեր երկրի ղեկավարը վերջերս հայտարարել է, որ կլիներ տնտեսության թռիչքային աճ, սակայն կորոնավիրուսը խանգարեց։ Բայց, ըստ Պողոսյանի, թռիչքային բարձրացում կլիներ, եթե արձանագրվեր ապրանքների գնանկում։
«Մինչև կորոնավիրուսը և՛ արտահանումն է աճել, և՛ ներկրումը։ Եթե երկուսն էլ աճել են, կարծես թե ամեն ինչ դրական ընթացք է ստանում, բայց արտահանումը աճել է 11%-ով, իսկ ներկրումը՝ 14%-ով։ Այսինքն՝ տարբերությունը ի վնաս մեզ է եղել, դա նվաճում չէ։ Ստացվում է, որ մենք կերակրում ենք Թուրքիայում աշխատող բանվորներին, եթե մեր գումարի մի մասը գնում է այնտեղ, որտեղից ստանում ենք այդ բարիքները՝ լինի հագուստ, թե սննդամթերք»,- ասաց Արմեն Պողոսյանը։
Դիտարկմանը, որ ինքն ամիսներ առաջ բարձրաձայնել էր օպտիկական ակնոցների շուկայում առկա խնդիրների մասին, Արմեն Պողոսյանն արձագանքեց՝ ահազանգից հետո որևէ փոփոխություն չի եղել։
«Շուկայում կան և՛ օրգանական ապակուց, և սովորական ապակուց ոսպնյակներ։ Չի կարող օրգանական ապակին ապահովել այն որակը, որն ունի ապակուց պատրաստված ոսպնյակը։ Իսկ մեր շուկայում ոսպնյակների 95%-ը օրգանական ապակուց է։ Մենք այդ հարցով դիմել ենք Էկոնոմիկայի նախարարություն, բայց որևէ քայլ չի արվել։
Օրգանական ապակին ֆիլտրացիայի ժամանակ իր կորությունը փոխում է, և չի ապահովում այն ճշտությունը, որն ապակին ունի։ Խնդիրը կա, բայց մենք ե՞րբ կիմանանք, թե որ ժամանակահատվածում որքանով վատացավ մարդկանց տեսողությունը, եթե նախօրոք քայլեր չանենք։ Փաստորեն, այս ոլորտում էլ առաջընթաց չունեցանք»,- նշեց նա։
Արմեն Պողոսյանը նշեց, որ շատ ոլորտների վերաբերյալ բարձրաձայնված խնդիրները մինչ օրս լուծումներ չեն ստացել. «Երկու տարի առաջ մի կին ահազանգել էր, որ երկու երեխաների համար դպրոցական պայուսակ է գնել և երկուսն էլ հենց առաջին օրը պատռվել են։ Մենք մի կերպ գնացինք և կարողացանք ապրանքը փոխանակել, բայց երեխաների տոնը խաթարվեց, չէ՞։ Ցավն այդ է։ Կասկածելի որակ ունեցող ապրանքների մեծ մասը չինական ծագում ունի։ Մենք ունենք պարտադիր սերտիֆիկացման մասին օրենք և սերտիֆիկացման մասին օրենք։ Տարբերությունն այն է, որ ապրանքների մի խմբաքանակը պարտադիր պետք է սերտիֆիկացվի, բայց կան ապրանքներ, որոնց սերտիֆիկացումը թողնվում է ներկրողի կամքին։ Հիմա նույնիսկ պարտադիր սերտիֆիկացման մասին օրենքի դեպքը վաճառակետի համար է խիստ կարևոր, իսկ ներմուծման ժամանակ չկա որևէ պատնեշ, որ հենց երկիր ներմուծվելուց վատ ապրանքի մուտքն արգելվի։ Իսկ երբ այդ ապրանքը մուտք է գործում երկիր և տարածվում է խանութներում, վերահսկելը մնում է զուտ էնտուզիազմի վրա»։
Հարակից հրապարակումներ`
Լրահոս
Տեսանյութեր
Իրավապաշտպան. Ադրբեջանի համագործակցության կոչ-առաջարկն իրավական հիմնավորումներ չունի
