Ձեր վստահելի աղբյուրը

Մինսկում, հիվանդանոցում, մահացել է Բրեստից 43-ամյա Գենադի Շուտովը, ով օգոստոսի 11-ին հրազենային վնասվածք էր ստացել գլխի հատվածում: Այս տեղեկությունը հայտնում է TUT.BY- ն՝ հղում անելով քաղաքացու հարազատներին: «Ինտերֆաքս»-ի փոխանցմամբ, ավելի վաղ հաղորդվել էր ցույցերի մասնակիցների երեք մահվան դեպքի մասին:

Մահացածի ընտանիքը երկու օր փնտրել է Շուտովին: Ի պատասխան հարազատների հարցումների, ականատես վկաներն ասել են, որ կրակել են նրա վրա, հավանաբար շենքի տանիքից, երբ նա ուղղակի քայլել է:

Ընտանիքը պարզել է, որ նրան նախ տեղափոխել են Բրեստի տարածաշրջանային հիվանդանոց, այնուհետև ուղղաթիռով հասցրել են Մինսկ: Նա մահացել է օգոստոսի 19-ի առավոտյան:

Բելառուսի ՆԳՆ-ն նախկինում հաստատել էր, որ Բրեստում, օգոստոսի 11-ի երեկոյան, ոստիկանությունը հրազենային կրակ է բացել ցուցարարների վրա, և մեկ մարդ վիրավորվել է: Կրակը բացվել է ագրեսիվ տրամադրված մարդկանց  ուղղությամբ, որոնց ձեռքերին եղել են երկաթյա ձողեր, որոնք չեն ենթարկվել կանգնելու նպատակով օդում արձակված նախազգուշական կրակոցներին:

Ավելի վաղ պաշտոնապես հաստատվել էր 19-ամյա ցուցարարի մահը, որը վրա էր հասել Մինսկում օգոստոսի 16-ին արտասահմանյան մեքենայով վրաերթի հետևանքով: Գոմելում օգոստոսի 9-ին, հիվանդանոցում մահացել էր 25-ամյա մի տղամարդ, որին ձերբակալել էին և  որի զգացողությունը վատացել էր ոստիկանական մեքենայում: Օգոստոսի 11-ի լույս 12-ի գիշերը Մինսկում սպանվել էր 34-ամյա Ալեքսանդր Թարայկովսկին: Բելառուսի Ներքին գործերի նախարարությունը խոստացել է զբաղվել ոստիկանության կողմից ուժի չարաշահման դեպքերով: