Ձեր վստահելի աղբյուրը

«Ամուլսար ասելիս ծնկներս դողում են» ՀՀ կառավարություն», «Ամուլսարի ՇՄԱԳ-ը ուժը կորցրած պիտի ճանաչենք», «Մենք ենք մեր սարերը ու կողքի մանր-մունր քարերը» կոչերով Երևանի Ազատության հապարակում մեկնարկեց բողքի ակցիա՝ ի պաշտպանություն Ամուլսարի։

Ակցիայի մասնակիցներից Անի Խաչատրյանը տեղեկացրեց, որ օնլայն ստորագրահավաք է սկսվել՝ ուղղված ՀՀ վարչապետ Նիկոլ Փաշինյանին և Շրջակա միջավայրի նախարար Ռոմանոս Պերոսյանին։ Նա ընթերցեց տեքստը, որով իրենք դիմում են Կառավարությանը.

«Հարգելի՛ պարոն վարչապետ և նախարար, կարիք չենք համարում կրկնել Ամուլսարի հարցի շուրջ վերջին՝ առնվազն ութ տարում ներկայացված փորձագիտական հիմնավորումները՝ Հայաստանի և առավելապես Վայոց Ձորի էկոլոգիայի, ջրային պաշարների, տնտեսության ճյուղերի՝ ներառյալ խաղողագործության և գինեգործութան, ինչպես նաև դեմոգրաֆիայի և մարդկանց առողջության վրա ունեցած ազդեցության մասին։ Մենք հիմք ենք ընդունում «Էլարդ»-ի զեկույցը, որը հստակ և առանց տարընթերցումների, մատնանշում է «Լիդիանի»՝ շրջակա միջավայրի վրա ազդեցության (ՇՄԱԳ) և այլ փաստաթղթերի թերի լինելը։ Եվ նման հիմնավորումը չպետք է ընդունել, ուստի անհրաժեշտ է նոր ու գիտականորեն հիմնավորված ՇՄԱԳ»։

Խաչատրյանը ներկայացրեց Ջերմուկ խոշորացված համայնքի բնակչության ճնշող մեծամասնության դիրքորոշումը, այն է՝ Ամուլսարը սար թողնել, և արգելել մետաղական հանքարդյունաբերությունը։

«Պահանջում ենք ուժը կորցրած ճանաչել Կառավարության 2016 թվականին տված փորձաքննական  դրական եզրակացությունը»,- նշեց նա։

Նա հիշեցրեց, որ 2.5 տարի ջերմուկցիները փակ են պահել դեպի հանք տանող ճանապարհները և պահանջում են հանքի շահագործման նախագիծը հետ կանչել։

Անի Խաչատրյանը շեշտեց՝ Կառավարությունը մինչև օրս որևէ կերպ չի արձագանքում ջերմուկցիների բողոքին։

«Կան բոլոր հիմքերը, ՇՄԱԳ-ը ուժը կորցրած ճանաչելու։ Կառավարությունը 400 հազար դոլար վճարեց «Էլարդ» և «Թիարսի» ընկերություններին, և նրանց եզրակացության մեջ ասվում է՝ այս ՇՄԱԳ-ով հնարավոր չէ կառավարել ռիսկերը և ծրագիրը իրականացնել։ Նրանք էլ են ասել, որ նոր ՇՄԱԳ-ի կարիք կա։ Մեր պահանջն էլ այն է, որ Կառավարությունը կատարի իր խոստումը, իսկ Նիկոլ Փաշինյանը շատ անգամներ հայտարարել է՝ եթե փորձաքննությունն ասի՝ նոր ՇՄԱԳ-ի կարիք կա, ապա ուժը կորցրած կճանաչվի հին ՇԱՄԳ-ը։ Հիմա մենք ուզում ենք հիշեցնել իր խոստումը»,- ասաց նա։

Ակցիայի մասնակիցներին զայրացրել է նաև այն, որ Ամուլսարի համար մղվող պայքարը ոմանք որակում են` որպես որոշակի քաղաքական ուժերի կողմից հրահրվող քայլ։

«Ուրեմն այդ մարդիկ չեն կարողանում մեզ հետ մասնագիտական դաշտում բանավիճել և ինչ-որ պատմություններ են հնարում։ Բայց սա ջերմուկցու պայքարն է՝ իր ոտնահարված իրավունքները պաշտպանելու համար։ Շուրջ 3000 հոգի արդեն ստորագրել է, որ դեմ է Ամուլսարի շահագործմանը»,- նշեց ակցիայի մասնակիցներից մեկը։