Ձեր վստահելի աղբյուրը

«Իմ տպավորությամբ, այս նախագիծն ուղղակի գլխատում է դպրոցի ղեկավարությունը և հիմնական հարվածը գնում է որոշ ղեկավար հաստիքների վրա»,-«Մեդիա կենտրոն»-ի նախաձեռնած տեսակապով քննարկմանը հայտարարեց կրթության փորձագետ Սերոբ Խաչատրյանը:

Վերջինս նման կարծիք հայտնեց Կրթության, գիտության, մշակույթի և սպորտի նախարարության մշակած և հանրային քննարկման ներկայացրած հանրակրթական ուսումնական հաստատությունների ֆինանսավորման նոր կարգի վերաբերյալ։

Փորձագետը նկատեց, որ կրթության ոլորտի պատասխանատու գերատեսչության ղեկավարները պնդում են, որ բարձրացվում է դպրոցների ինքնավարությունը: Սերոբ Խաչատրյանի  դիտարկմամբ, այն ենթադրում է  դպրոցների մենեջմենթի ուժեղացում, որպեսզի նրանք կարողանան ինքնուրույնությունը կառավարեն, բայց ներկայացվող նախագծով տրամագծորեն հակառակ լուծումներն են առաջարկվել:

Նախագծով դպրոցի ուսումնական գծով փոխտնօրենը դառնում է ուսումնադաստիարակչական գծով փոխտնօրեն, որով նրանց ծանրաբեռնվածությունը մեծացվում է: Կրթության փորձագետը նկատեց, որ դրան զուգահեռ նախագծով  նախատեսվում է մինչև 12 դասարան ունեցող դպրոցներում ուսումնադաստիարակչական գծով փոխտնօրենի համար սահմանել կես դրույք աշխատավարձ:

«Այստեղից ես կարող եմ ենթադրել, որ այդ փոխտնօրենը կարող է առավոտյան 8-ին ներկայանալ աշխատանքի և ժամը 12-ին ավարտել այն»,- եզրակացրեց Խաչատրյանը՝ շեշտելով, որ խոսքը գնում է դպրոցում դասապրոցեսի հիմնական կարգավորողի և ամենածանրաբեռնված անձի մասին:

Փորձագետը հայտարարեց, որ Հայաստանի 1400 դպոցից 1000-ը  ունեն 12-ից պակաս դասարաններ՝465 դպրոց ունի մինչև 100 աշակերտ և 516 դպրոց՝ մինչև 300 աշակերտ:

«Ստացվում է, որ Հայաստանի 1000 դպրոց ունենալու է կես դրույքով ուսմասվար, դպրոցներն ըստ էության,  գլխատվում են՝ բառիս բուն իմաստով»,- եզրակացրեց Սերոբ Խաչատրյանը:

Այդ դպրոցները չեն ունենալու նաև գրադարանավարներ և գործավարներ, իսկ վերջիններս, ըստ Սերոբ Խաչատրյանի, կատարում են մեծ ծավալի տեխնիկական աշխատանք: