Ձեր վստահելի աղբյուրը

«Երեկ Հանրապետության երրորդ նախագահը ցույց տվեց, որ ինքն իսկապես պետական մտածողություն ունեցող գործիչ է»,- այսօր լրագրողների հետ զրույցում ասաց «Համերաշխություն» կուսակցության նախագահ Սարգիս Ավետիսյանը՝ անդրադառնալով ՀՀ երրորդ նախագահ Սերժ Սարգսյանի մամուլի ասուլիսին։

Նրա խոսքով, բոլոր խելամիտ քաղաքացիները ընդունում և կիսում են ՀՀ երրորդ նախագահի տեսակետն ու արտահայտած մտքերը։  Ըստ բանախոսի, երեկվա ասուլիսը ցուցիչ էր, և ներկայիս վարչապետն ու իշխանական վերնախավը պետք է Սերժ Սարգսյանից օրինակ վերցնեն, թե ինչպիսին պետք է լինի ղեկավարը և ինչպես պետք է պատասխանի հարցերին։

«Խոսքը վերաբերում է նաև այն լրատվամիջոցների հարցերին, որոնք ունեն շատ հստակ դիրքորոշում և սպասարկում են որոշակի արտաքին նեգատիվ ուժերի։ Այդ ձևով նախագահը ցույց տվեց, որ համերաշխության մթնոլորտում կարելի է պատասխանել ցանկացած հարցի։ Դա մի փոքր հատված էր, որտեղ իսկապես համերաշխության մթնոլորտ էր տիրում, և հարցերը քննարկվում էին բարեկամաբար, այլ ոչ՝ թշնամաբար։ Իսկ մենք գիտենք, որ երկրում արդեն երկու տարի մասնատված վիճակ է, և ցանկացած քննարկում կատարվում է թշնամական մթնոլորտում»,- կարծիք հայտնեց Սարգիս Ավետիսյանը։

Անդրադառնալով երկրում կորոնավիրուսի տարածման տեմպերին՝ բանախոսը նշեց՝ իրեն հաճախ հարցնում են, թե ինչու է երկրում նման իրավիճակ ստեղծվել և ինչու են կորոնավիրուսով վարակված հիվանդներն այդքան շատ.

«Թվում է՝ Հայաստանն այնպիսի երկիր է, որտեղ կարելի է վիրուսի տարածումը «կոնտրոլի» տակ պահել։ Բայց մի բան պետք է հաշվի առնել. երբ մարդկանց մեջ ատելությունը ավելի գերակշիռ է դառնում, քան համերաշխությունը, այդ ատելությունը թուլացնում է մարդկանց իմունիտետը։ Դա ապացուցված է նաև բժիշկների կողմից։ Եվ այս իրավիճակը ցույց տվեց, որ ՀՀ-ն աշխարհի բազմաթիվ երկների շրջանում այն եզակիներից է, որտեղ հասարակության մեջ ատելության չափաբաժինը գերակշռում է։ Հետևաբար մարդկանց իմունիտետը թուլացել է, և նրանց վրա ավելի շատ է ազդում կորոնավիրուսը»։

Հարցին՝ արդյո՞ք Սերժ Սարգսյանի ասուլիսը կարելի է համարել ինչ-որ նոր գործընթացի մեկնարկ, Սարգիս Ավետիսյանը պատասխանեց՝ կարելի է այդպիսի ենթադրություն անել։

«Բայց եթե ուզում ենք հասկանալ, թե ապագայում ինչ կլինի, և ինչ կարելի է անել, պետք է ուշադրություն դարձնել ՀՀ երկրորդ նախագահի հարցազրույցներին, որտեղ շատ հստակ է ամեն ինչը և շատ ավելի լայն շրջանակ է ընդգրկված։ Իսկ ՀՀ երրորդ նախագահը շատ փոքր շրջանակի մասին խոսեց։ Պետք է շատ ուզենանք, որ նոր քաղաքական զարգացումների հետ կապված ենթադրություններ անենք»,- ասաց նա։

Ըստ բանախոսի, երկու տարվա ընթացքում ժողովրդի կյանքում ոչինչ դեպի լավը չի գնացել։
Նա նշում է, որ հասարակությունը սպասում էր իրավիճակի փոփոխություն՝ դեպի լավը, այսինքն՝ սպասում էր կյանքի որակի, սոցիալական վիճակի և բարոյահոգեբանական վիճակի լավացում, սակայն դա չի եղել։

«Հասարակության մեջ գնալով բողոքական մասը մեծանում է։ Ես գիտեմ բազմաթիվ մարդկանց, որոնք եղել են Նիկոլ Փաշինյանի կողմնակիցը, բայց այժմ չեն ուզում նրա անունն անգամ լսել։ Եվ մարդիկ անպայման ուզում են ինչ-որ ելք գտնել և հարցին լուծում տալ։ Մարդիկ արդեն հասկանում են, որ Նիկոլ Փաշինյանն ու իր քաղաքական թիմը ի վիճակի չէ այս երկիրը կառավարելու։  Այս մարդը ի վիճակի չէ պետություն կառավարել, այն էլ այս իրավիճակում, երբ բազմաթիվ մարտահրավերներ կան։ Այսպիսի որակներով մենք որևէ լավ բանի չենք կարող հասնել»,- շեշտեց բանախոսը։

Սարգիս Ավետիսյանի կարծիքով, այժմ պետք է վերհանել բոլոր այն խնդիրները, որոնք առաջացրել են այս իշխանությունները, ապա մտածել, թե ինչպես պետք է այդ խնդիրները լուծել։

«Այս իշխանությունը, երբ եկավ, իմ տրամաբանությամբ, խնդիր դրեց Հայաստանը կազմալուծելու։ Օրինակ, Կառավարության մեջ տեղի ունեցան փոփոխություններ, նախարարություններ փակվեցին։ Մենք ունենք սփյուռք, բայց ոչնչացվեց  Սփյուռքի նախարարությունը։ Նույնը վերաբերում է Մշակույթի նախարարությանը, երբ մենք, ունենալով հզոր մշակույթ, վերացրինք նախարարությունը։ Կրթության ոլորտում էլ նոր չափորոշիչներ են բերում, եկեղեցու պատմությունն էլ են հանում։ Նրանք ուզում են, որ հայ անունը վերանա, որ ինչով մենք գոյատևել ենք, դրա հիմքերը կտրվեն։ Հիմա էլ դպրոցների տնօրենների աշխատավարձներն են կրճատում. որևէ կառավարություն նման բան չի արել։ Նման  խայտառակ ծրագիր մեկ էլ եղել է Լևոն Տեր-Պետրոսյանի իշխանության օրոք։ Հիմա էլ Նիկոլ Փաշինյանն է իրականացնում ՀՀ առաջին նախագահի ծրագիրը, այն է՝ Հայաստանը կազմաքանդել»,- նշեց Սարգիս Ավետիսյանը։