Ձեր վստահելի աղբյուրը

Կառավարության շենքի դիմաց հավաքված են քաղաքացիներ, որոնցից ամեն մեկը բարձրաձայնում է իր խնդիրները՝ ակնկալելով դրանց լուծում։

Հավաքված քաղաքացիների մի խումբը, հիմնականում ՌԴ քաղաքացիներ,  աջակցություն է խնդրում՝ կազմակերպել ուղիղ չվերթներ՝ Ռուսաստան գնալու համար։ Նրանք արդեն մի քանի անգամ եղել են կառավարության շենքի դիմաց, նաև ՀՀ-ում ՌԴ դեսպանության, սակայն նշում են, որ որևէ փոփոխություն չի եղել, իրենց խնդիրը չի լուծվում։

«Նստած են իրենց աթոռներին, ոչ մեկին  ժողովրդի հարցը չի հետաքրքրում, չեն  ուզում ժողովրդի  հարցը լուծել։ Իսկ վարչապետը հեղափոխության ժամանակ ասում էր՝ եկեք սատարեք,  հեղափոխություն անենք, իսկ հիմա ժողովրդին է պետք սատարել, ոչ մեկ չի ուզում ժողովրդի հարցը լուծել»,- ասաց բողոքող քաղաքացիներից մեկը։

Նրանք կարծում են, որ մեկ զանգով Հայաստանի ղեկավարությունը կարող է այդ հարցը լուծել. «Վրաստանի հետ թող բանակցեն, ճանապարհները բացեն, ժողովուրդը կարողանա դուրս գնա։ Մեծ մասը մեքենայով են եկել, կարող են իրենց հետ 1-2 մարդ տեղափոխել։ Ինչի՞ համար թույլ չեն տալիս։ Այսինքն իրենք չեն ուզում ցածրանալ, զանգ տան կամ պայմանավորվեն Վրաստանի հետ»։

«Խոստումներ տվեցին, որ կզանգեն, կօգնեն մեզ, իրականում ոչ մեզ զանգել են, ոչ կանչել են։  Այսօր պայքարում ենք, որ Նիկոլ Փաշինյանը դուրս գա ու խոսի մեզ հետ։ Ուզում ենք բոլորիս մարդու տեղ դնեն»,- լրագրողներին ասաց ՌԴ քաղաքացի, իրավապաշտպան Դավիթ Հարությունյանը։

Նա նշեց, որ եթե հիմա այս հարցը չլուծվի, իրենց մարդու տեղ չդնեն, իրենք այլևս  Հայաստան չեն գա։ Դ.Հարությունյանը նշեց, որ  նախկին ակցիաներին իրենց կողքին կանգնած ու պայքարող քաղաքացիներից մեկը մահացել է։

Բողոքող քաղաքացիներից մեկն իրանցի է, 35 տարի Գերմանիայում է  ապրել, 5 տարի առաջ եկել է Հայաստան, ընկերություն է բացել, «սակայն ուրիշ մարդ իր ֆիրման վերցրել է, հիմա ասում են, որ 100 հազար դոլար հարկային պետք է վճարի»։ Նա ցանկանում է հանդիպել վարչապետ Նիկոլ Փաշինյանին։
Մյուս իրանցին էլ պնդում է, որ չի կարողացել բիզնես գործություն ծավալել, քանի որ նախկին պաշտոնյաները խանգարել են իրեն, ֆինանսական վնասներ է կրել։