Ձեր վստահելի աղբյուրը

«Միջազգային բանակային խաղեր 2020» մրցաշարի  պաշտոնական կայքում ներկայացված են այն երկրները, որոնք հաստատել են իրենց մասնակցությունը «Տանկային բիաթլոն» մրցույթին։  Հայաստանն այս մրցույթին մասնակցում է 2013 թվականից, սակայն այս տարի իր մասնակցությունը չի  հաստատել։

Panorama.am-ը հարցրեց ՀՀ պաշտպանության նախարարության մամուլի խոսնակ Շուշան Ստեփանյանից, թե ինչո՞ւ  Հայաստանը չի մասնակցում «Տանկային բիաթլոն» մրցույթին։  Նա ասաց, որ այս տարի նպատակահարմար են գտել ուսումնասիրել նոր չափանիշները։

«Նախորդ տարիների համեմատ չափանիշներ են փոխվել, նաև մրցումների բովանդակությունն է փոխվել։ Այս տարի հետևելու, ուսումնասիրելու ենք նոր չափանիշները, հաջորդ տարի միանգամից մի քանի բիաթլոնի կմասնակցենք»,- ասաց նա։

Հարցին՝ մինչ այս այդ չափանիշներն արդյո՞ք հրապարաված չէին, որպեսզի ծանոթանայիք, Շ.Ստեփանյանը պատասխանեց. «Այսքանը կարող եմ ասել, որ մենք նպատակահարմար ենք գտնել  այս տարի ուսումնասիրել, հաջորդ տարի ավելի պատրաստված ներկայանալ»։

«Տանկային բիաթլոնն»  անցկացվում է «Միջազգային բանակային խաղեր» մրցաշարի շրջանակում։ Մրցաշարը մեկնարկում է օգոստոստի 23-ից, շարունակվելու է մինչև սեպտեմբերի 5-ը։ Մրցույթին մասնակցելու համաձայնություն են տվել՝ Ռուսաստանը, Աբխազիան, Ադրբեջանը, Բելառուսը, Վիետնամը, Ղազախստանը, Քաթարը, Կոնգոն, Ղրղզստանը, Չինաստանը, Լաոսը, Մյանմարը, Սերբիան, Տաջիկստանը, Ուզբեկստանը և Հարավային Օսիան:

2014-ին Հայաստանի տանկիստների թիմը գրավել էր «Տանկային բիաթլոնի» երկրորդ հորիզոնականը և մրցանակ ստացել Տ-90Ս տանկ։