Ձեր վստահելի աղբյուրը

Այսօր բողոքի ակցիա իրականացրած Մարալիկի պոլիկլինիկայի և ծննդատան  աշխատակիցները Շիրակի մարզպետարան  էին գնացել։  Մարզպետարանի առողջապահության և սոցիալական ապահովության վարչության  պետի պարտականություններ կատարող Լեյլի Ասլանյանն ասաց, որ պետք է աշխատանքային քննարկում լինի փոխմարզպետի մասնակցությամբ, իրենց էլ մտահոգում է ծննդատան աշխատակիցների հարցը։

Նա նշեց, որ նախարարի հրամանով սահմանված են չափորոշիչներ, որոնց համապատասխանության դեպքում ծննդօգնություն  իրականացնող բուժհաստատություններին տրվում են մակարդակներ, Մարալիկի մանկաբարձագինեկոլոգիական բաժանմունքը չէր համապատասխանում այդ չափորոշիչներին։

Նա նշեց, որ բազմաթիվ քննարկումներ, հանդիպումներ են ունեցել այս խնդրով։

«Մենք հարցը բարձրաձանում ենք, լուծում են պատկան մարմինները։ Մեր վերջին գրությունը վարչապետին և տարածքային կառավարման նախարարին եղել է  օգոտոսին 4-ին, դեռևս պատասխան չունենք»,- ասաց Լ.Ասլանյանը։

Նշվեց, որ քննարկումը փակ է։

Շիրակի փոխմարզպետ Վարդան Գրիգորյանը լրագրողներին ասաց, որ նոր է տեղեկացել, թե իբր քննարկվելու է Մարալիկի ծննդատան աշխատակիցներին աշխատանքից ազատելու հարցը:

«Նմանանատիպ քննարկում չի նախատեսվել այսօր և մոտ ապագայում չկա նախատեսված: Ես չգիտեմ, թե այդ տեղեկությունը որտեղից է։ Այս պահին, համենայնդեպս, մեզ մոտ նման քննարկում չկա։ Մեզ մոտ տնօրենն է հրավիրվել, որպեսզի ֆինանսիստի հետ ընթացիկ ֆինանսական և իրավաբանական հարցեր քննարկեն և հստակեցվեն: Դա ընդամենն  աշխատանքային տիրույթում է և աշխատողներին աշխատանքից ազատելու հետ կապված չէ»,- ասաց Վ. Գրիգորյանը:

Ըստ նրա, մարզպետարանի ջանքերը միտված է նրան,  որ որևէ բուժաշխատատեղ չփակվի և հիմա սպասում են առողջապահության նախարարության պատասխանին, հստակեցնելու, թե ինչ դիրքորոշում ունի կառավարությունը Մարալիկի ծննդատունը փակելու կամ պահելու վերաբերյալ:

Նա նշեց, որ  ծննդատանը թերություններ են եղել, որոնք հիմա շտկվել են, նախարարությունից հանձնաժողովի են սպասում, որպեսզի գան ու իրենց գնահատականը տան՝  արդյոք համապատասխանում է հաստատությունը չափանիշներին, թե չի բավարավում։

«Մենք համարում ենք, որ բուժհաստատությունն արդեն համապատասխանում է բոլոր նորմատիվներին աշխատելու համար։ Այս իրավիճակում խանգարում է համավարակի հետ կապված վիճակը, պետք  է մի փոքր համբերատար լինենք»,- նշեց Շիրակի փոխմարզպետը:

Հիշեցնենք, որ ծննդատան  աշխատակիցները 7 ամիս է աշխատավարձ չեն ստացել։ Փետրվարին տեղի է ունեցել  ուսումնասիրություն, որի արդյունքում  Մարալիկի առողջության կենտրոն ՓԲԸ –ի մանկաբարձագինեկոլոգիական բաժանմունքին կարգ չի շնորհվել, պետպատվերը մերժվել է։

Աշխատակիցներն ասում են, որ մի կերպ են ապրում։

«Զինվորի մայրիկ եմ, մի քանի ամիս է չեմ կարողանում իմ զինվորին օգնել»,- ասում է մանկաբարձուհի Մերի Ասատրյանը։

Մեկ այլ աշխատակից ասաց. «Այս ի՞նչ աբսուրդ երևույթ է՝ փակել ծննդատունը։ Քանի կար աշխատատեղ էին ավելացնում։ Այս ի՞նչ եղավ հանկարծ։  Հաստատվեցին աթոռներին ու եղածն էլ փակում են։ Քանի՞ ընտանիք է մնում գործազուրկ»։

Բուժաշխատողները նշում են, որ կորոնավիրուսի այս շրջանում ամբողջ ծանրությունն ընկած է բուժաշխատողների վրա, շտապօգնության վրա։

«Ղեկավարության որևէ ներկայացուցիչ չի արձագանքել շտապօգնության աշխատանքին։  Միայն պարգևավճարներն իրենց նախարարինն է ու  չգիտեմ ինչերինն է։  Ի՞նչ է՝ մի հատ ուշադրության արժանի չենք մենք։ Այդ հիվանդության հետ կռիվ ենք տալիս, գերծանրաբեռնված վիճակում աշխատում ենք, ոչ մի արձագանք, ոչ մի խրախուսական բան, ոչ մի պարգևավճար։ Ստացել ենք Սամվել Կարապետյանի ուղարկած պարգևավճարները, որի համար շնորհակալ ենք։

Կոպիտ ասած՝ թքած ունեն»,- ասաց աշխատակիցներից մեկը։

«Ծննդատան աշխատակիցներից Արեգնազան Բալոյանը խնդրեց վարչապետ Նիկոլ Փաշինյանին լուծում տալ հարցին։

«Մարալիկի ծննդատունը 17 գյուղի է սպասարկում, ինչի՞ պիտի այսօր այն փակվի, ծնունդ չընդունի, բուժանձնակազմը ինչո՞ւ պետք է այսօր բողոքի ակցիա անի։ Չէ՞ որ մենք ճանապարահ փակեցիքն։ Ես խալաթով ճանապարհ եմ փակել, դուխով վարչապետ եմ ուզել, որ այսօր այս խնդրի առաջ կանգնե՞նք, սա՞ էր մեր ուզած Հայաստանը։ Ես նկատողություն եմ ստացել, որ խալաթով, բաբուճներով  դուրս եմ եկել ու ճանապարհ փակել, ցանկացել եմ  որ Մարալիկը բարգավաճի»,- ասաց նա:

Տիկին Արեգնազանը նշեց, որ այսքան ժամանակ «բունտ» են անում, բայց առողջապահության նախարար Արսեն Թորոսյանը չի բարեհաճել գալ Մարալիկ ու հասկանալ, թե ինչի համար է ժողովուրդը  բողոքում։

«Ես միայնակ կին եմ, ոչ աշխատանք ունեմ, ոչ թոշակ ունեմ եմ, ինչո՞վ պետք է ապրեմ, ու ասում եք՝ դուխով Հայաստան, սա՞ է մեր դուխով Հայաստանը։  Խնդրում ենք, թող այս հարցին լուծեն»,- ասաց Արեգնազան Բալոյանը: