Ձեր վստահելի աղբյուրը

172 երկիր միացել է COVAX միջազգային մեխանիզմին, որի նպատակն է բոլոր երկրներին արդարության հիմունքներով ապահովել կորոնավիրուսի պատվաստանյութով, երբ այն ստեղծվի: ՏԱՍՍ-ի փոխանցմամբ այս մասին երկուշաբթի օրը Ժնևում կայացած ճեպազրույցում հայտարարել է Առողջապահության համաշխարհային կազմակերպության (ԱՀԿ) գլխավոր տնօրեն Թեդրոս Ադան Գեբրեյեսուսը:

Նա հիշեցրել է, որ  անցած շաբաթ բոլոր երկրներին նամակ է ուղարկվել՝ խնդրելով միանալ հակավիրուսային դեղամիջոցի ստեղծման աշխատանքների արագացման գործընկերությանը:

«Այսօրվա դրությամբ 172 երկիր մասնակցում է գլոբալ COVAX մեխանիզմին», - ասել է գործադիր տնօրենը:

Ըստ նրա հաղորդման, ներկայում պորտֆելում կա ինը պատվաստանյութ:

«Մենք աշխատում ենք պատվաստանյութ արտադրողների հետ, որպեսզի բոլոր այն երկրները, որոնք ժամանակին միանում են այդ ջանքերին, ունենան արդարացի հասանելիություն բոլոր արտոնագրված և հաստատված պատվաստանյութերին»,- ասել է ԱՀԿ ղեկավարը:

Գլխավոր տնօրենը շեշտեց, որ գլոբալ COVAX մեխանիզմին  երկրների մասնակցությունը հնարավորինս ցածր մակարդակի վրա կպահի պատվաստանյութերի գները: Ըստ Գեբրեյեսուսի, եթե պատվաստանյութեր մատակարարող երկրների թիվը փոքր լինի, ապա համաճարակը ավելի երկար կտևի. «Պատվաստանյութերի ոլորտում ազգայնամոլությունը միայն օգնում է վիրուսին»:

Թեդրոս Ադան Գեբրեյեսուսի խոսքով՝ պատվաստումների սկզբնական փուլում, երբ պատվաստանյութերի մատակարարումը սահմանափակ լինի, կարևոր է, որ այն տրամադրեն բոլոր նրանց, ովքեր ունեն ավելի բարձր ռիսկեր: Այս առումով նա առաջին դասում է ընդգրկել բուժաշխատողներին՝ բացատրելով, որ նրանք համաճարակի դեմ պայքարի առաջնագծում են: ԱՀԿ ղեկավարը պատվաստման առաջնահերթությունը տվել է նաև 65 տարեկանից բարձր անձանց, ինչպես նաև նրանց, ովքեր ունեն հիվանդություններ, որոնք մեծացնում են կորոնավիրուսով պայմանավորված մահվան վտանգը: Հաջորդ փուլում, երբ պատվաստանյութերի մատակարարման ծավալները մեծանան, պատվաստումները կարող են իրականացվել ելնելով յուրաքանչյուր երկրում վիրուսի խոցելիության գնահատումներից», - ասել ԱՀԿ ղեկավարը:

Նա հիշեցրել է, որ ներկայում աշխարհում մի շարք պատվաստանյութեր կլինիկական փորձարկումների ավարտական փուլում են և հույս  է հայտնելով, որ ի վերջո կհայտնվեն մի շարք հաջողակ թեկնածուներ, որոնք կլինեն անվտանգ և արդյունավետ»: Ինչ վերաբերում է COVAX- ի հեռանկարներին, ապա, ըստ գործադիր տնօրենի, երկրները պետք է կատարեն այս մեխանիզմին աջակցելու պարտավորեցնող խոստումները: Մեխանիզմի նպատակն այն է, որ մինչև 2021 թվականի ավարտն առնվազն 2 միլիարդ դեղաբաժին անվտանգ և արդյունավետ պատվաստանյութեր հատկացվեն: