Ձեր վստահելի աղբյուրը

Բելառուսի իշխանությունները, երկրում տիրող իրավիճակի հետ կապված, օգնություն չեն խնդրել Հավաքական անվտանգության պայմանագրի կազմակերպության (ՀԱՊԿ) պետություններից, ասել է ՀԱՊԿ գլխավոր քարտուղար Ստանիսլավ Զասը, փոխանցում է Interfax.by-ը։

«Մենք ունենք օգնություն ցուցաբերելու մեխանիզմ, ցանկացած օգնություն, որը կարող է տրամադրվել, կազմակերպվում է միայն պետության կողմից տրված դիմումի հիման վրա, հիմա Բելառուսից նման պահանջ չկա: Ավելին, ես վստահ եմ, որ Բելառուսն ի վիճակի է ինքնուրույն հաղթահարել իրավիճակը», - ասել է Զասը, որը Բելառուսի ներկայացուցիչն է։

Նա նշել է, որ Բելառուսի՝ օգնություն հայցելու դեպքում, կազմակերպությունը նախատեսում է անհապաղ խորհրդատվություններ անցկացնել բոլոր պետությունների ներգրավմամբ, ինչպես նաև օգնություն տրամադրել։

«Դա կախված է նրանից, թե պետությունն ինչպիսի օգնություն կխնդրի», - ասել է ՀԱՊԿ գլխավոր քարտուղարը:

Մեկ շաբաթից ավելի է, ինչ Բելառուսում շարունակվում են զանգվածային բողոքի ակցիաները նախագահական ընտրությունների արդյունքների դեմ, որոնցում հաղթող է ճանաչվել գործող նախագահ Ալեքսանդր Լուկաշենկոն, որը զբաղեցնում է այդ պաշտոնը 1994 թվականից: Ընտրությունները տեղի են ունեցել օգոստոսի 9-ին: Ըստ ԿԸՀ-ի հաստատած արդյունքների, ընտրողների 80.1% -ը քվեարկել է Լուկաշենկայի օգտին, 10,12% -ը՝  նրա հիմնական հակառակորդ Սվետլանա Տիխանովսկայայի օգտին: