Ձեր վստահելի աղբյուրը

Այսօր ապրիլյան պատերազմի անմահ հերոս, ավագ լեյտենանտ Մաքսիմ Գրիգորյանի ծննդյան օրն է։ Այսօր նա կդառնար 34 տարեկան։ Մաքսիմը զոհվել է  2016 թվականի ապրիլի 2-ին՝ մարտական գործողությունների ժամանակ 112 մարտական դիրքը պաշտպանելիս:

Ապրիլի 1-ի լույս 2-ի գիշերը ծանր մարտում զոհվել են տվյալ մարտական դիրքի և դրան հարակից այլ դիրքի 19 հայ զինծառայողներ. փոխգնդապետներ Ալեքսան Առաքելյանը, Օնիկ Գրիգորյանը, Ռոման Պողոսյանը, մայոր Սուրեն Մելքումյանը, ավագ լեյտենանտ Մաքսիմ Գրիգորյանը,  լեյտենանտ Աշոտ Շահբազյանը, սերժանտներ Արման Անդրեասյանը, Կարեն Ներսիսյանը, Ադամ Սահակյանը, կրտսեր սերժանտ Սաշա Գալստյանը, շարքայիններ Բագրատ Ալեքսանյանը, Տիգրան Բերակչյանը, Անդրանիկ Գրիգորյանը, Արթուր Գևորգյանը, Ժորա Եսայանը, Նորիկ Սարգսյանը, Գրիգոր Հարությունյանը, Ազատ Սիմոնյանը, Բորիս Օզմանյանը:

Մաքսիմ Գրիգորյանը Արցախի Հադրութի շրջանի Տումի գյուղից էր: 2004-2006թթ. եղել է պարտադիր զինվորական ծառայությունում: 2008թ. ավարտել է Ստեփանակերտի Գր. Նարեկացու անվան համալսարանը և նույն թվականին աշխատանքի ընդունվել N զորամասում` որպես պայմանագրային զինծառայող: Եղել է մոտոհրաձգային վաշտի տեխնիկ: 2008թ. ավարտել է ՀՀ ՊՆ ենթասպաների դպրոցը և ստացել ենթասպայի կոչում: 2012թ. բարեխիղճ ծառայության համար և, ելնելով անհրաժեշտությունից, նշանակվում է N զորամասի հրամանատարի` սոցիալ-իրավական աշխատանքների գծով օգնական` ստանալով լեյտենանտի կոչում: 2014թ հուլիս-օգոստոս ամիսների գործողությունների ժամանակ ակտիվ մասնակցություն է ունեցել պետական սահմանի պաշտպանության գործում: Պարգևատրվել է «Մարտական ծառայություն», «Անբասիր ծառայության» 1-ին աստիճանի, «Երկրապահ», ՀՀ ԶՈՒ 20-ամյակին նվիրված մեդալներով: