Ձեր վստահելի աղբյուրը

Երևան քաղաքի ընդհանուր իրավասության դատարանի Կենտրոն նստավայրում, նախագահությամբ դատավոր Արթուր Մկրտչյանի, մեկնարկել է ՀՀ ֆինանսների նախկին նախարար Գագիկ Խաչատրյանի և նրա եղբորորդու՝ ՊԵԿ ներքին անվտանգության վարչության նախկին ղեկավար Կարեն Խաչատրյանի գործով քննությունը։

Դատավորը  հարցրեց, թե արդյոք կողմերը նախագահող դատավորին ինքնաբացարկի միջնորդություն հայտնելու հիմքեր ունեն, թե ոչ։ Մեղադրանքի կողմն ասաց՝ ոչ։ Պաշտպանական կողմից Երեմ Սարգսյանը նշեց, որ այդ հարցին  պատասխանելու համար իրենց որոշակի պարզաբանումներ են  անհրաժեշտ՝ հասկանալու համար դատարանը, նախագահող դատավորը կանխակալ վերաբերմունք ունի, թե ոչ։

«Օրինակ, մենք ամբողջ նախաքննության ընթացքում մշտապես բարձրաձայնում ենք այն խնդիրը, որ այս քննական գործով բոլոր միջնորդությունները նախնական փուլում, որոնք վերաբերում են Գագիկ Խաչատրյանին, ձեր կողմից մակագրվում էին դատավոր Արտուշ Գաբրիելյանին։ Խնդրում եմ, որպեսզի դատարանը բացահայտի, թե ինչ կարգով է որոշումը կայացվել, որ նախկինում այդ միջնորդությունները պետք է մակագրվեն հենց Արտուշ Գաբրիելյանին, որպեսզի հասկանանք՝ դատավորը պահապանել է օրինականության  սկզբունքը, թե սա կամայակն և ինչ-ինչ  հանգամանքներով պայմանավորված որոշում է եղել»,- ասաց Ե.Սարգսյանը։

Պաշտպան Ամրամ Մակինյանը  միացավ Երեմ Սարգսյանի միջնորդությանը։

Մեղադրող դատախազն ասաց, որ պարբերաբար չի մակագրվել դատավոր Արտուշ Գաբրիելյանին։
Դատարանը պարզաբանեց, որ ՀՀ դատական օրենսգրքի համաձայն` դատարանի նախագահն ապահովում է դատարանի բնականոն գործունեությունը և այդ սկզբունքից ելնելով, հաշվի առնելով դատավորների ծանրաբեռնվածությունը, հերթապահության մեջ լինելը, իրականացրել է համապատասխան մակագրությունը։

Երեմ Սարգսյանը նաև ասաց. «Արդյոք այս գործով դատարան ներկայացվել են քրեական գործով իրեղեն ապացույցները, որոնք, ըստ մեղադրական եզրակացության, պահվում են ԱԱԾ-ում։ 37 հատոր քրեական գործ է դատարան ուղարկվել, անցել է 8 օր։ Մեզ համար խիստ կասկածելի է՝ դատարանը 8-9 օրում արդյո՞ք հասցրել է 37 հատորանոց քրեական գործի նյութերին ծանոթանալ, կարողանալո՞ւ է դրանց հիման վրա հիմնավոր կասկածի, կալանավորման  հիքմերի,  առողջական վիճակի հետ կապված բավական նուրբ և էական հարցերին անդրադառնալ ու որոշել՝ առկա է կալանավորման անհրաժեշտություն, թե ոչ։  Ես որ նայում եմ, առնվազն 10 հազար 705 թերթ է 37 հատորը։ Այսինքն՝ դատարանը օրվա կտրվածքով 1300-ից ավելի թերթ պետք է ծանոթանար։ Համաձայնվենք, ուղղակի անհնար է։ Արդյոք սա ձևական բնույթ չի՞ կրելու, թե՞ դատարանն իրոք հասցրել է ծանոթանալ և կարող է արդարացի, գործի նյութերի հիմնա վրա, պատճառաբանված որոշում կայացնել»։

Պաշտպան Ամրամ Մակինյանը միացավ  Երեմ Սարգսյանի դիտարկումներին, ասաց, որ դատարանի տրամադրության տակ չի գտնում որպես մեղադրյալ ներգրավված 34 աշխատակիցների անձնական գործերը. «Գործում առկա են բազմաթիվ էլեկտրոնային կրիչներ, որոնք մեզ չեն տրամադրվել։ Էլեկտրոնային կրիչների մի մասը վերաբերում է այս անձանց աշխատավարձերի հաշվարկման չափերին, որոնք շատ էական են այս գործով հիմնավոր կասկածի հարցը քննելու ժամանակ»։

Դատավորն ասաց, որ հիմնավոր կասկածին դատարանը անդրադառնա  հետևյալ չափանիշով՝ եթե գործը մեղադրական եզրակացությամբ ուղարկվել է դատարանին և անձին առաջադրվել է մեղադրանք՝ արդյոք դա բավարա՞ր է, որպեսզի դատարանը համարի հիմնավոր կասկածի շեմը հաղթահարված։

Երեմ Սարգսյանն ասաց, որ ունի դատավորին ինքնաբացարկի միջնորդություն ներկայացնելու հիմքեր, սակայն ձեռնպահ կմնա այս պահին այդ միջնորդությունից։

Պաշտպանական կողմը մեղադրող դատախազին բացարկի միջնորդություն ներկայացրեց՝ նշելով, որ դատախազը մինչդատական վարույթում չի պահպանել օրինականությունը։ Դատարանը հեռացավ խորհրդակցական սենյակ որոշում կայացնելու, որը կհրապարակվի այսօր ժամը 15։00-ին։

Գագիկ Խաչատրյանը  դատական նիստին ներկա չէ։ Նա առողջական խնդիրներ ունի և դիմում է ներկայացրել դատարան, որպեսզի նիստը շարունակվի առանց իր ներկայության։