Ձեր վստահելի աղբյուրը

«Առողջական ծանր վիճակով պայմանավորված կալանքի տակ երկարատև պահելը հանգեցում է  խոշտանգման, Եվրոպական կոնվենցիայի 3-րդ հոդվածի խախտում է»,- Երևան քաղաքի ընդհանուր իրավասության դատարանում՝ նախագահությամբ դատավոր Արթուր Մկրտչյանի, դատավարությանն ասաց ՀՀ ֆինանսների նախկին նախարար Գագիկ Խաչատրյանի պաշտպան Երեմ Սարգսյանը։

Նա նշեց, որ եթե նախկինում ասում էին՝ վատ վերաբերմունք է տեղի ունենում, ինչը ևս  կոնվենցիայի խախտում է, այս պահին արդեն խոշտանգում է։

«Մեկ տարի անձին  զրկել են առողջական և բժշկական համարժեք բուժումից։ Անձն իր ոտքով եկել է վարույթ իրականացող մարմնի մոտ,  վարույթ իրականացնող մարմնի գործողության հետևանքով այսօր հենակներով է քայլում։ Սա բացառապես պետության մեղքով է, և ամեն օր բացասական միտում կա։ Սա ակնհայտ խնդիր է»,- նշեց պաշտպանը։

Նա հիշեցրեց, որ Գագիկ Խաչատրյանը, երբ հետվիրահատակ բուժում էր  ստանում Գերմանիայում, քննիչը հեռախոսով կանչել է նրան հարցաքննության։

«Գագիկ Խաչատրյանը կիսատ է թողել հետվիրահատական բուժումը, վերադարձել Հայաստան։ Նա չի խուսափել, չի թաքնվել, թեև ուներ Հայաստան չգալու իրական հնարավորություն»,- ասաց պաշտպանը։

Երեմ Սարգսյանի խոսքով, կառավարությունն իր իսկ կատարած խոստումների հետ հաշվի չի նստում, իր իսկ կատարած հետազոտությունների, որոշումների հետ հաշվի չի նստում,  Եվրոպական դատարանի որոշման հետ հաշվի չի նստում, հստակ գիտեն, որ առողջական վիճակում բացասական դինամիկա կա, հստակ գիտեն, որ վիրահատության կարիք ունի,  բայց ոչ մեկ ոչ մի քայլ չի անում։

«Հիմա սա խոշտանգո՞ւմ է, թե՞ ոչ»,- հարցադրում արեց Գագիկ Խաչատրյանի պաշտպանը։

Ըստ նրա, այս ամեն ինչը վկայում է այն մասին, որ եթե անձի առողջության բացասական դինամիկա կա պետական մարմինների պատճառով, ուրեմն այստեղ լուրջ խնդիր ունի պետությունը։

«Գտնում եմ, որ առկա է խոշտանգում, վատ վերաբերմունք, սա միանշանակ բավարար հիմք է անձին կալանքից  ազատելու համար։ Այս հիմքով միջնորդում եմ, որպեսզի դատարանը կալանքից ազատ արձակի, այլընտրանքային խափանման միջոց ընտրի, որը կապված չէ ազատությունից զրկելու հետ»,- ասաց Երեմ Սարգսյանը։

Նա նաև հիշեցրեց կորոնավիրուսի հետ կապված Եվրոպայի խորհրդի խոշտանգումների կոմիտեի զեկույցը, ըստ որի՝ կալանքի տակ գտնվող անձանց դեպքում խորհուրդ էր տվել հնարավորինս անազատության հետ կապված խափանման միջոցներ չկիրառել, նաև խոցելի խմբերի, 60-ից բարձր տարիք ունեցող անձանց նկատմամբ լինել ուշադիր, իսկ Գագիկ Խաչատրյանը 60-ից բարձր տարիք ունի, նաև ուղեկցող  մի շարք հիվանդություններ։